Pritet të zgjasë gjashtë minuta!
Pas pak më shumë se dy vitesh, pritet të ndodhë eklipsi më i madh total diellor i shekullit të 21-të.
Ky moment po “vjen” më 2 gusht 2027.
Është fenomeni për të cilin astronomët tashmë po përgatiten me ethe, duke e ditur se nuk do të përsëritet në kushte kaq ideale deri në vitin 2114.
Eklipsi i 2 gushtit 2027 nuk është thjesht një eklips total. Falë një shtrirjeje të rrallë gjeometrike, kohëzgjatja e eklipsit total diellor do të arrijë 6 minuta e 23 sekonda – më e gjata mbi tokë që nga viti 1991.
Hija e Hënës do të udhëtojë më shumë se 15,000 kilometra, duke filluar nga Oqeani Atlantik, duke kaluar Mesdheun, Lindjen e Mesme dhe Afrikën Lindore, përpara se të zhduket në thellësitë e Oqeanit Indian.
E ashtuquajtura “vijë qendrore” e tërësisë do të ofrojë kushte mbresëlënëse shikimi në shumë zona:
Spanja (Cádiz, Malaga) dhe Maroku (Tangier, Tetouan) do të shohin më shumë se 4 minuta eklips total.
Libia dhe Bengazi, me një kohëzgjatje deri në 5 minuta.
Egjipti, ku fenomeni arrin kulmin: në shkretëtirë, vetëm 40km në juglindje të Luksorit, eklipsi arrin kohëzgjatjen e tij maksimale: 6 minuta dhe 23 sekonda errësirë totale.
Prej andej, hija do të vazhdojë drejt Detit të Kuq, Arabisë Saudite (Xheda, Mekë), Jemenit, Somalisë dhe së fundmi mbi ujërat e Oqeanit Indian. Jashtë zonës së totalitetit, një eklips i pjesshëm do të jetë i dukshëm nga pothuajse e gjithë Evropa, Afrika Veriore dhe Lindore dhe pjesa më e madhe e Azisë Perëndimore.
Kohëzgjatja e totalitetit ndikohet nga tre faktorë përcaktues:
Distanca e Hënës nga Toka (perigjeu hënor): Sa më afër të jetë Hëna, aq më e gjatë është hija e saj.
Distanca e Tokës nga Dielli (afelion): Sa më larg të jetë Toka nga Dielli, aq më i vogël është diametri i saj i dukshëm.
Gjeometria e orbitës: Kur hija kalon ekuatorin, ajo lëviz më ngadalë mbi sipërfaqen e Tokës.
Luksori, qyteti i faraonëve dhe tempujve, pritet të bëhet epiqendër globale atë ditë. Agjencitë turistike kanë filluar tashmë të rezervojnë hotele pranë tempujve të Ramsesit II dhe Hatshepsutit, pasi vendi konsiderohet ideal për astrofotografi.
