Ishujt e mallkuar, vrasjet e pazgjidhura dhe Atlantida të tjera të humbura. Ishujt e rrethuar nga mistere, mite dhe histori të çuditshme.
Pra, bëhuni gati për të udhëtuar në 10 ishuj me historitë më rrëqethëse dhe misterioze, si dhe tek zbulimi i “Atlantidave të reja”.
1. La Gaiola e mallkuar
Në jug të Italisë ekziston një ishull, La Gaiola, i cili në pamje të parë duket i bukur. Ishulli ndodhet në Gjirin e Napolit, është i ndarë në dy pjesë, të cilat bashkohen me një urë, ndërsa rrethohet nga rrënojat antike që datojnë që nga Roma e Lashtë. Në të kaluarën, disa njerëz të pasur konkurronin me njëri-tjetrin se kush do të merrte në pronësi ishullin e bukur për të kaluar pushimet e tyre atje.
Tani, La Gaiola është e braktisur, me një vilë të pabanuar.
Arsyeja? Thjesht, kushdo që merrte pronësinë e ishullit duhej të përballej me më shumë se fat të keq. Banori i parë i ishullit ishte një vetmitar i njohur vetëm me pseudonimin “magjistari” dhe ai jetoi atje në fillim të shekullit të 19të. “Mallkimi” i ishullit fillon pra pas këtij banori misterioz, në vitin 1920. Në atë kohë, një pasanik kishte ndërtuar një vilë në ishull dhe kishte shkuar të qëndronte me gruan e tij. Megjithatë, pak më vonë ai u gjet i vrarë dhe trupi i tij i mbështjellë në një qilim. Jo shumë kohë më vonë, edhe gruaja e tij u gjet e vdekur. Duket se ishte mbytur në ujërat e qeta të gjirit.
Pastaj ishulli i kaloi një gjermani të pasur të quajtur Otto Grunback. Por gjermani i pasur nuk e shijoi për një kohë të gjatë ishullin e bukur, sepse vdiq nga një atak në zemër.
Pronari tjetër, një manjat zviceran që zotëronte një kompani farmaceutike, u çmend dhe kreu vetëvrasje. Lista tragjike nuk ndalet këtu.
Pronari i radhës ishte djali i kreut legjendar të Fiat, Gianni Agnelli. Por edhe ai pati të njëjtin fat si manjati zviceran. Stafetën e mori nipi i tij Angelli që ishte trashëgimtari i pasurisë së tij. Por edhe ai vdiq nga një formë jashtëzakonisht e rrallë e kancerit. Pronari i radhës nuk vdiq por falimentoi, ndërsa nipi i tij J.Paul Getty u rrëmbye menjëherë pasi bleu La Gaiola.
Tani e bukura La Gaiola është e pabanuar dhe vila është e braktisur.
Edhe sikur të ta falnin, do të shkonit?
2. Palmyra ishte fundi i një udhëtimi të gjatë
Palmyra është një ishull i bukur dhe ndodhet 1600 kilometra në jug të Hawait. Megjithatë, përtej bukurisë së tij, ishulli njihet edhe për një ngjarje tragjike. Palmyra ishte fundi i udhëtimit për Malcolm “Mac” Graham dhe Eleanor “Muff” Eddington. Ata të dy ishin një çift i bukur, i pasur dhe i dhënë pas lundrimit. Ata u martuan në vitin 1961 dhe më pas kaluan një muaj mjalti që zgjati për gjashtë vjet. Çifti udhëtoi nëpër botë duke bërë hobin e tyre të preferuar, lundrimin.
Në vitin 1974 ata vendosën të bënin një tjetër udhëtim të madh. Më 2 korrik ata u gjendën në Palmyra dhe ky do të ishte fundi i udhëtimeve të tyre. Menjëherë pasi Grahams mbërritën në ishullin e bukur, ata takuan një çift tjetër, Roy dhe Stephanie Allen. Të paktën ky ishte emri me të cilin ishin prezantuar, sepse në realitet ata ishin Buck Duane Walker, një i arratisur dhe e dashura e tij Stephanie Streans. Megjithatë, marrëdhënia mes dy çifteve nuk ishte më e mira, pasi Grahamët kishin frikë nga “Roy”, pasi ai po peshkonte duke përdorur armën e tij. Por çifti i paligjshëm vendosi të rregullonte marrëdhënien e tyre me Grahams dhe u largua nga vendbanimi. Por prej asaj dite Mac dhe Muff Graham nuk u dëgjuan më.
Njëmbëdhjetë vjet më vonë, një trupë gjyqësore e dënoi Walkerin për vdekjen e Muff, trupi i të cilit u gjet i djegur me plagë të dukshme plumbash. Është shumë e mundur që Walker të ketë vrarë edhe Macin, trupi i të cilit nuk u gjet kurrë. Vrasësi u dërgua në burg dhe vdiq nga kanceri pak më vonë.
3. Galapagos i përgjakshëm
Kjo histori e veçantë mund të jetë një kombinim i një telenovele dhe një historie misteri vrasjeje. Në vitet 1930, një dentist gjerman, Friedrich Ritter, vendosi të jetonte i qetë me një pacient të tij, me të cilin ra në dashuri, në ishujt me famë botërore Galapagos, të cilët atëherë ishin shumë pak të populluar.
Në të njëjtin ishull jetonte një ish ushtar Heinz Wittmer, por edhe një grua e çuditshme që e quante veten baronesha Eloise Wehrborn de Wagner-Bosquet. Pra, baronesha ishte çdo gjë tjetër veçse diskrete, pasi kishte të dashur nga më të ndryshmit, mburrej se donte të ndërtonte një hotel në ishull, ndërkohë që kishte tërhequr edhe interesin e shtypit, pasi ecte vetëm me të brendshme.
Kjo sjellje e saj i mërziti Ritterët që kishin ardhur në ishull për të jetuar të qetë dhe pa bujë. Prandaj, Ritters dhe baronesha luftuan mjaft shpesh, ndërsa Wittmer mbeti i papërfshirë dhe i qetë. Por gjërat u përkeqësuan edhe më shumë kur dy të dashuruarit e gruas ekscentrike filluan të ziheshin. Njëri quhej Philippson dhe duke qenë se ishte më i madh, ai shpesh e mundte të dytin, Lorenzin. Prandaj Lorenzi u largua nga rezidenca e baroneshës dhe gjeti strehim në shtëpinë e Wittmer.
Në mars 1934, baronesha dhe i dashuri i saj Philippson u zhdukën. Sipas Wittmer dhe familjes së tij, çifti u nis për në Tahiti. Megjithatë, kjo histori ishte e pabazë pasi askush nuk kishte parë ndonjë anije që t’i afrohej ishullit dhe baronesha kishte lënë pas sende të çmuara.
Sipas Ritter dhe partnerit të tij, Lorenzi i vrau baroneshën dhe Philippson dhe për të mbuluar krimin bindi Wittmer-in që të banonte me të për pak kohë. Lorenz nuk qëndroi gjatë në ishull. Pasi bindi një peshkatar që ta merrte me vete, u largua, por të dy u gjetën muaj më vonë të vdekur nga dehidratimi në ishullin Marchena. Ka mundësi që anija të jetë prishur dhe të dy burrat nuk mund të largoheshin nga Marchena.
Por vdekjet nuk mbarojnë me kaq. Pak kohë më vonë Ritter vdiq nga helmimi. Megjithatë, shumë besojnë se partnerja e tij e vrau atë dhe partnerin e tij, pasi ishin ndarë dhe ajo ndihej e braktisur. Ajo shpejt u kthye në Gjermani dhe i la Wittmers-at vetëm në ishull.
Në vitin 2014, kjo histori e çuditshme dhe misterioze u bë film.
4. Diçka si Atlantida e humbur në ishullin japonez të Yonaguni Jima
Gjeologia Masaaki Kimura është e bindur se ka zbuluar një qytet të lashtë japonez që daton ndoshta 5000 vjet më parë. Ky zbulim i saj gjendet jashtë ishullit Yonaguni Jima dhe ajo beson se është një qytet që u fundos pas një tërmeti të madh. Ka disa struktura guri që Kimura pretendon se janë ndërtuar nga njerëzit.
Por gjeologët nuk janë të gjithë mbështetës të së njëjtës teorie. Në fakt, gjeologu Robert Schoch beson se këta shkëmbinj nuk janë të krijuar nga njeriu, por e kanë marrë këtë formë nga përplasja e detit me shkëmbinjtë. Të njëjtin mendim duket se ka miratuar edhe qeveria japoneze, e cila nuk ka dhënë leje për hetime shtesë.
Por Masaaki Kimura nuk donte të hiqte dorë nga teoria e saj. Në fakt, për ta mbështetur atë, ajo solli si shembull një cunami që goditi Japoninë në vitin 1771. Diçka e tillë, thotë Kimuri, mund të ketë ndodhur edhe më herët, me rezultat që një qytet është fundosur dhe këto rrënoja janë ato që kanë mbetur nga një tjetër Atlantis.
5. Avioni i zhdukur i Malaysian Airlines kaloi nëpër Maldive
Pak kohë më parë zhdukja misterioze e avionit të Malaysian Airlines tronditi të gjithë botën. Askush nuk mund të jepte një shpjegim logjik sesi u zhduk avioni dhe ku ishte drejtuar. Megjithatë, banorët e Kudahuvadhoo, një ishull në Maldive, pretendojnë se e kanë parë avionin duke kaluar mbi ishull dhe madje duke fluturuar mjaft ulët.
Misteri bëhet edhe më i ndërlikuar pasi pak kohë pasi avioni u zhduk, një objekt i çuditshëm u gjet në një plazh të ishullit. Banorët lajmëruan policinë pasi menduan se bëhej fjalë për një mjet shpërthyes, ndërsa policia tha se nuk ishte eksploziv, por nuk pranoi të vazhdonte më tej. Një departament lokal i urgjencës pretendoi se mund të ishte një nga motorët e zjarrit të avionit.
Megjithatë, përkundër asaj që pretendojnë banorët, në zonë nuk u krye asnjë kërkim, pasi zyrtarët theksuan se avioni nuk mund të kishte arritur në Maldive.
6. Arkivolët lëvizës në Barbados
Në vitin 1808 një ngjarje tragjike i ndodhi familjes Chases, pasi humbën vajzën e tyre të vogël Mary. Trupi i foshnjës ishte vendosur në një arkivol metalik, në një kriptë. Disa vite më vonë Dorcas Chase u vetëvra nga uria, ndërsa një muaj më vonë vdiq edhe babai i dy vajzave, kolonel Chase. Pas funeralit të burrit, kripti u hap për të vendosur arkivolin. Por u zbulua se arkivoli i Marisë ishte ngritur dhe ishte vendosur në një qoshe të kriptës. Njerëzit menduan se kishte shkuar ndonjë hajdut, që kishte hyrë në varr për të vjedhur. Kështu ata e vulosën më mirë varrin dhe nuk i kushtuan më shumë rëndësi faktit.
Megjithatë, kur varri u rihap për një funerali tjetër, u zbulua se asnjë nga arkivolet nuk ishte në pozicionin e tij origjinal. Më pas filluan të tregoheshin histori se pranë varrit dëgjoheshin zëra dhe kuaj galopantë. Tre vjet më vonë, varri u hap përsëri dhe u zbulua se arkivolet ishin hedhur poshtë.
Guvernatori Lord Combermere vendosi t’i jepte fund kësaj historie. Kjo është arsyeja pse ai e siguroi varrin shumë mirë duke vendosur edhe rërë brenda tij për të parë nëse do të kishte ndonjë gjurmë. Varri u hap kështu për herë të fundit, por arkivolet ishin zhvendosur përsëri nga pozicioni i tyre origjinal, ndërsa rëra ishte e paprekur. Më pas, arkivolet u hoqën nga kripti dhe u varrosën në pjesë të tjera të varrezave.
Që atëherë është supozuar se kripta ishte përmbytur dhe uji lëvizte arkivolët. Por duke qenë se askush nuk e vërtetoi, mbeti një mit dhe secili dha versionin e vet.
7. Një plazh me mistere në Ishujt Marieta
Në ishujt Marieta në Meksikë, njerëzit indogjenë Huicol ndjekin ende traditat e lashta duke kryer ceremoni për nder të Atit Diell dhe Nënës Oqean. Huicol i mban këto rituale për të ruajtur ekuilibrin midis perëndive, që besohet se janë të bashkuar në ishullin e pabanuar të Marieta, Redonda.
E megjithatë misteri i vërtetë nuk është ky, por një plazh që ekziston në qendër të ishullit dhe askush nuk mund ta kuptojë se si është krijuar. Sipas ekspertëve, një plazh i tillë është i pamundur të ekzistojë në një ishull vullkanik. Një shpjegim, megjithatë, është se ky plazh i veçantë u krijua pas shpërthimeve të testuara nga forcat ushtarake që kishin shkuar në ishull për teste ushtarake. Këtë version nuk e pranojnë banorët, e refuzojnë si të pabazë dhe pa argument, ata e shikojnë fenomenin si diçka të mistershme.
8. I vetmi i mbijetuar ishte një vrasës psikopat
Ishulli George ndodhet në brigjet e Labradorit dhe ishte një vend i lumtur deri në vitin 1876. Më pas ndodhi mbytja e anijes Walrus me kapitenin që u kërkonte marinarëve të shkonin tek varkat e shpëtimit. Por vetëm njëri arriti të shpëtonte veten dhe të arrinte në breg. Të paktën kjo ishte historia që u tregoi peshkatarëve që e gjetën dhe e ndihmuan.
Më vonë, megjithatë, disa peshkatarë të tjerë vizituan ishullin George dhe gjetën kufoma njerëzore në breg, të cilat ishin gjymtuar. Në fakt, kokat e tyre mungonin, ndërsa një tjetër kufomë kishte plagë me sëpatë në kokë. Punëdhënësi i peshkatarëve vizitoi ishullin për të varrosur trupat dhe zbuloi disa letra të kalbura dhe një fotografi të një gruaje të panjohur. Me sa duket trupat e gjymtuar të gjetur nga peshkatarët ishin burra nga ekuipazhi i Walrus. Por i vetmi i mbijetuar ishte vrasësi i tyre, të cilin kishin takuar, por që u zhdukur dhe askush nuk e gjeti më.
9. Pushime fatale për dy motra në ishullin Phi Phi
Në vitin 2012, motrat kanadeze Audrey dhe Noemi Belanger vizituan ishullin Phi Phi në Tajlandë për pushimet e tyre. Por aty do të jetonin momentet e fundit të jetës së tyre. Dy gratë u gjetën të vdekura në dhomën e tyre të hotelit, ndërsa autoritetet thanë se ishin helmuar nga një insekticid që zakonisht gjendet në sasi më të vogla në shurupin e kollës.
Babai i vajzës ka mohuar me forcë që vajzat e tij do të pinin një gjë të tillë dhe pohoi se autoritetet dhe stafi i hotelit po mbulojnë atë që ka ndodhur realisht që çoi në vdekjen e vajzave. Në fakt, një video tregonte se dy motrat kishin shkuar në dhomën e hotelit me dy portugezë, të cilët mund të dinin shkaqet e vërteta të vdekjes, por u lejuan të largoheshin nga Tajlanda.
Edhe sot e kësaj dite nuk dihet sesi dhe pse u helmuan dy motrat.
10. Atlantida e Brazilit
Kontinenti legjendar i humbur i Atlantidës ka ngjallur interes në mbarë botën me disa mite që zhvillohen rreth tij. Por brazilianët u gjendën përballë një kontinenti tjetër misterioz të humbur dhe po përpiqen të zbulojnë më shumë informacion. Për të qenë të saktë, gjeologët brazilianë së bashku me shkencëtarët japonezë zbuluan një granit dy mijë e gjysmë metër në fund të oqeanit. Meqenëse graniti mund të formohet vetëm në tokë, shkencëtarët mendojnë se ka shumë të ngjarë që ka pasur një kontinent që u fundos dhe u zhduk.
Aktualisht, arsyet pse graniti u gjet i zhytur në oqean nuk dihen dhe për këtë arsye kërkimi nuk ka përparuar, për të vërtetuar nëse ka pasur vërtet një kontinent të humbur. Megjithatë, edhe nëse rezulton të jetë një kontinent i humbur, shkencëtarët theksojnë se nuk mund të jetë Atlantida mitike, por një tjetër.
