Ungjilli sipas Lukës 15:4-10
4. ”Cili njeri prej jush, që ka njëqind dele dhe një prej tyre t’i humbasë, nuk i lë të nëntëdhjetë e nëntat në shkretëtirë dhe nuk shkon pas asaj që humbi derisa ta gjejë?
5. Dhe, kur e gjen, e merr mbi supe gjithë gaz;
6. dhe, kur arrin në shtëpi, i thërret miqtë dhe fqinjët dhe u thotë: “Gëzohuni bashkë me mua, sepse e gjeta delen time që më kishte humbur.
7. Dhe unë po ju them se po kështu në qiell do të ketë më shumë gëzim për një mëkatar të vetëm që pendohet, sesa për nëntëdhjetë e nëntë të drejtët, që nuk kanë nevojë të pendohen.
8. Ose, cila grua që ka dhjetë dhrahmi dhe humbet një nga ato, nuk ndez llambën, nuk e fshin shtëpinë dhe nuk kërkon me kujdes derisa ta gjejë?
9. Dhe, kur e gjen, fton tok shoqet dhe fqinjët, duke thënë: “Gëzohuni bashkë me mua, sepse e gjeta dhrahminë që kisha humbur”.
10. Po kështu po ju them: do të ketë gëzim në mes të engjëjve të Perëndisë për një mëkatar të vetëm që pendohet”.
***
Jezu Krishti u tha farisenjve rëndësinë e shëmbëlltyrës.
Ai u tha se ata që mëkatojnë janë si delet e humbura. Ashtu siç bariu donte të shpëtonte delen e humbur, Jezusi dëshiron të shpëtojë mëkatarët. Jezusi tha se kjo ishte arsyeja pse ai po fliste me mëkatarët.
