Në këtë rajon, në jug të Rusisë, të martën depërtuan forcat e ushtrisë ukrainase.
Luftimet janë ndezur në Kursk të Rusisë pas sulmit të papritur të ukrainasve në territorin rus dhe në fakt zhvillimet janë serioze, pasi administrata ruse ka shpallur provincën në gjendje të jashtëzakonshme.
Zëvendësguvernatori i rajonit të Kurskut, Alexei Smirnov, përmes aplikacionit Telegram, e shpalli rajonin gjendje të jashtëzakonshme.
Në këtë rajon, në jug të Rusisë, forcat e ushtrisë ukrainase depërtuan të martën dhe duket se kanë pushtuar një sipërfaqe prej 350 kilometrash katrorë dhe tani po mbrohen për t’u fortifikuar.
“Situata operacionale mbetet e vështirë në zonat kufitare. Për të kufizuar pasojat e pushtimit të forcave armike, vendosa të shpall gjendjen e jashtëzakonshme”, tha Smirnov.
Moska njoftoi më herët sot se ishte e angazhuar në luftime të ashpra kundër forcave ukrainase që hynë në rajonin Kursk të Rusisë, në një nga inkursionet më të mëdha në tokën ruse, që nga fillimi i luftës në Ukrainë në shkurt 2022.
Forcat ukrainase përparuan në veri, në perëndim të qytetit kufitar Sunja (të cilin e kanë në duart e tyre), 530km në jugperëndim të Moskës, siç thuhet nga Ministria e Mbrojtjes ruse.
Ministria e Mbrojtjes e Rusisë tha se ushtria ruse po luftonte ende me ukrainasit në rajonin e Kurskut, pranë kufirit Rusi-Ukrainë.
“Sulmet ajrore, forcat raketore, zjarri i artilerisë dhe veprimet e njësive që mbulonin kufirin shtetëror e penguan armikun të avanconte thellë në territorin e Federatës Ruse”, thuhet në deklaratë.
Ministria ruse e Mbrojtjes vuri në dukje se luftimet po vazhdonin, duke shtuar se ajo kishte shkatërruar tashmë 50 automjete të blinduara, duke përfshirë shtatë tanke, tetë transportues të personelit të blinduar, tre automjete luftarake të këmbësorisë dhe 31 automjete të blinduara luftarake.
Alexei Smirnov, guvernatori i përkohshëm i rajonit të Kurskut, tha se kishte sulme me raketa dhe dron gjatë natës dhe u bëri thirrje qytetarëve që të mbrohen duke qëndruar larg dritareve.
“Për shkak të situatës në rajonet kufitare të rajonit, shërbimet mjekësore po rimbushin furnizimet me gjak nga dhuruesit”, tha Smirnov, duke shtuar se një pikë ambulante dhurimi gjaku do të ngrihet në Kursk, vendi i betejës më të madhe tokësore në botë, gjatë Luftës së Dytë Botërore.
