Autoritetet spanjolle në alarm të kuq, dy javë pas përmbytjeve vdekjeprurëse.
Në Itali, shirat e rrëmbyeshëm shkaktuan përmbytje që rrëmbyen makinat.
Si Spanja ashtu edhe Italia janë në gatishmëri, pasi moti i keq intensiv godet Malagën, Tarragonën jugore dhe Siçilinë.
Málaga dhe sektori jugor i Tarragona janë në alarm të kuq. Mbrëmë janë evakuuar 3,000 persona, ndërsa sot janë evakuuar edhe banorë të tjerë të krahinës. Autoritetet vlerësojnë se alarmi do të qëndrojë në të njëjtin nivel të paktën deri në mesnatë.
Reshjet e dendura të shiut kanë shkaktuar përmbytje në disa rrugë, ndërsa probleme të ngjashme ka edhe në pjesë të veçanta të spitalit Clínico, ku punëtorët po heqin ujin.
Pak para orës dy pasdite me orën lokale, treni me shpejtësi të lartë AVE midis Malaga-s dhe Madridit pushoi së funksionuari. Pak kohë më vonë, një stacion në Malaga u evakuua ndërsa këshilli i qytetit pezulloi funksionimin e autobusëve të qytetit.
Në Tarragona, alarmi i kuq do të zgjasë deri në orën 22:00 me orën lokale. Aktiviteti është reduktuar në minimum dhe disa rrugë dhe autostrada janë prekur.
Një paralajmërim portokalli për shi është lëshuar për rajone të tjera të Andaluzisë, Katalonjës dhe Valencias. Qeveria rajonale e Valencias ka kufizuar deri të enjten trafikun privat në komunat e zonës zero të Valencias.
Një paralajmërim i verdhë për shi, stuhi, borë ose det të trazuar është lëshuar për Asturias, Castile, León, Galicia dhe Murcia.
Pritet mbi 40 litra për metër katror, në gjysmë ore.
Shërbimi Meteorologjik i Katalonjës (Meteocat) ka ngritur në të kuqe (niveli 5 në shkallën 6) alarmin për intensitetin e shiut në rajonet Baix Ebre dhe Montsia, Terres de l’Ebre.
Katalonja po përgatitet për reshje të vazhdueshme dhe të dendura, të cilat mund të kalojnë kufirin prej 40 litrash për metër katror për gjysmë ore deri në orën 18:00 pasdite. Sipas Meteocat, veriu ekstrem i Katalonjës është gjithashtu në gatishmëri, në këtë rast portokalli, për shkak të mundësisë së reshjeve të mëdha në rajonet Alt dhe Baix Empordà.
Qendrat shëndetësore që i përkasin rrethit shëndetësor Malaga-Guadaljorce mbyllën dyert për shkak të stuhisë. Pikat e urgjencës mbetën të hapura, sipas Delegacionit Shëndetësor të Qeverisë Rajonale të Andaluzisë.
Po kështu, Spitali Clínico de Málaga ka aktivizuar planin e tij të emergjencës për përmbytjet. Tani do të funksionojë vetëm për raste urgjente. Mediat spanjolle raportojnë se Laboratori i Analizave Klinike dhe disa zona të parkingut ishin më të prekurit. Në të njëjtën kohë është evakuuar një qendër shëndetësore në një lagje të Madridit, ndërsa janë transferuar shërbimet e urgjencës së një qendre shëndetësore në komunën e Malagas.
Makinat i rrëmbeu uji në Siçili.
Në Siçili, ujërat e përmbytjeve lanë makinat në Torre Archirafi të Siçilisë të mërkurën, madje duke i çuar disa prej tyre në det.
Përmbytjet janë pasojë e shirave të rrëmbyeshëm në Siçili që i kanë kthyer rrugët në lumenj, në një qytet afër Catania-s.
Banorët vendas bënë mbi 30 kërkesa për ndihmë për shërbimet e urgjencës. Deri më tani nuk ka raportime për persona të zhdukur për shkak të motit ekstrem, raporton agjencia italiane e lajmeve Ansa.
Zjarrfikësit shpëtuan disa shoferë të bllokuar në makinat e tyre nga përmbytjet në qytetin e Aci Sant’Antonio. Një person tjetër u shpëtua nga shërbimet e urgjencës pasi shtëpia e tij u përmbyt në Acireale.
Në qytetin Altarello, departamenti i zjarrfikësve përdor një automjet amfib për të shpëtuar katër persona, duke përfshirë dy persona me aftësi të kufizuara, pasi kati përdhes i një shtëpie u përmbyt.
Shkencëtarët argumentojnë se kriza klimatike, e shkaktuar nga emetimet njerëzore të gazeve serrë, po i bën ngjarjet ekstreme të motit, si valët e të nxehtit, thatësirat, stuhitë dhe përmbytjet më të shpeshta dhe më intensive.
Italia ka përjetuar një sërë ngjarjesh ekstreme të motit në vitet e fundit, megjithatë këtë vit rajonet jugore të vendit, si Sicilia, pësuan reshje të dendura shiu, madje edhe tornado.
