Synimi i përbashkët i SHBA-ve dhe Republikës së Qipros për sigurinë në rajon.
“Më shumë do të njoftohen në të ardhmen e afërt.”
Nëse lajmi i mbërritjes në Qipro të sistemit izraelit anti-ajror dhe antibalestik BARAK shkaktoi shqetësim të madh në Turqi, lajmi i bisedës telefonike mes Presidentit të Republikës së Qipros Nikos Christodoulidis dhe Presidentit të zgjedhur të SHBA-ve, Donald Trump me synimin për të forcuar bashkëpunimin mes të dyja palëve në pjesën e Mbrojtjes, është e sigurtë që ka alarmuar shumë Ankaranë.
Siç raporton Agjencia e Lajmeve të Qipros: “Presidenti i Republikës, z.Nikos Christodoulidis ka zhvilluar sot një bisedë telefonike me Presidentin e zgjedhur të Shteteve të Bashkuara të Amerikës (SHBA), z.Donald Trump.
Gjatë bisedës së tyre, Presidenti Christodoulidis e uroi z.Trump për zgjedhjen e tij në presidencën amerikane dhe nënvizoi synimin për të punuar ngushtë së bashku, për të forcuar më tej lidhjet midis dy vendeve.
Në veçanti u përmend edhe bashkëpunimi i gjerë mes dy vendeve dhe niveli i lartë që ata kanë arritur së fundmi në fusha si mbrojtja dhe siguria, investimet, ekonomia, si dhe në drejtim të ofrimit të ndihmës humanitare dhe përballjes së krizave në rajonin e Mesdheut Lindor.
Më tej, u shpreh qëllimi i përbashkët që në kuadër të marrëdhënieve strategjike dhe të dialogut strategjik ndërmjet Qipros dhe SHBA-ve, bashkëpunimi dypalësh në një sërë fushash duhet të zgjerohet dhe forcohet, si në dobi të dy vendeve, ashtu edhe në përgjithësi të rajonit.
U diskutuan edhe zhvillimet shqetësuese në rajonin e Mesdheut Lindor, ku presidenti Christodoulidis theksoi se Qiproja mbetet një partner i ngushtë dhe i besueshëm i SHBA-ve në përpjekjet për të promovuar paqen, stabilitetin dhe zhvillimin në rajon.”
Presidenti i Republikës, z.Nikos Christodoulidis.
Në deklaratat e tij duke ardhur në Forumin e Riskut në Larnaka dhe i pyetur për çështjen e sistemit antiraketor të Qipros, Presidenti i Republikës tha: “Absolutisht asnjë deklaratë tani mbi thelbin e lëvizjeve që po bëjmë për të forcuar fuqinë parandaluese të Republika e Qipros.
E vetmja gjë që mund të them është se do të bëjmë dhe po bëjmë gjithçka që është e nevojshme për të forcuar fuqinë parandaluese të Republikës së Qipros, jo vetëm për faktin se jemi një vend i pushtuar, por edhe si shtet anëtar i Bashkimit Europian, në një rajon me rëndësi të veçantë gjeostrategjike, ne duhet, dhe e përsëris, se po e bëjmë këtë konkretisht dhe larg çështjeve aktuale, që të forcojmë pra fuqinë parandaluese të Republikës së Qipros.
Pikërisht në këtë kontekst, për t’iu referuar një teme, për të cilën kohët e fundit kemi dëgjuar gjëra të ndryshme, po ndërmarrim veprime edhe në lidhje me Shtetet e Bashkuara të Amerikës (SHBA) dhe NATO-n. Fakti që ne nuk mund të jemi aktualisht anëtarë të aleancës së Atlantikut të Veriut pengon që Garda Kombëtare, në nivele të ndryshme, të forcohet më tej. Ne, pikërisht për të përballuar këtë problem, kemi ndërmarrë veprime konkrete, veçanërisht me SHBA-të, për të forcuar fuqinë parandaluese të Republikës së Qipros, për të forcuar Gardën Kombëtare.
Shumë është bërë dhe paralajmëruar. Më shumë do të njoftohen në të ardhmen e afërt.”
Ndaj parashtrimit të një gazetari se ka një reagim të madh nga Turqia, Presidenti i Republikës së Qipros shtoi: “Nuk dua të komentoj reagimet e Turqisë. Turqia mund të pozicionohet ashtu siç e sheh të arsyeshme”.
