Kardinali nga Çikago i SHBA-ve, deri para pak orësh Robert Prevost, zgjodhi emrin Leo XIV.
Në mesazhin e tij të parë në italisht – spanjisht (meqenëse është me origjinë nga Peruja) por jo në anglisht, foli për paqe dhe përfshirje globale, substanciale.
Emri i primatit të ri të Kishës Katolike Romake, i cili i përket rendit Augustinian, ka një histori të gjatë në Kishën Katolike dhe disa nga paraardhësit e tij madje e gjetën veten nën shpatën e sundimtarëve dhe iu nënshtruan vullnetit të tyre.
Leo i parë dhe të tjerët!
Leo I, i njohur edhe si Leo i Madh, ishte kreu i Kishës Katolike Romake nga viti 440 deri në vitin 461. Ai kishte edhe nofkën “Doktor i Kishës” dhe pati guximin në vitin 452 të takohej personalisht me Atilën për të parandaluar pushtimin e Romës nga hordhitë e këtij të fundit.
Leo II u bë i njohur si “Pontifi i shkurtër” pasi qëndroi në detyrë nga viti 682 deri në vitin 683 dhe është njeriu që ratifikoi rezultatin e Sinodit të Tretë të Kostandinopojës.
Leo III 795–816 është Papa që i dha Karlit të Madh titullin Perandor i Perandorisë së Shenjtë Romake me anë të një vule papnore në vitin 800 e transformoi atë nga një ushtar, gjeneral dhe luftëtar, në një figurë politike për botën europiane të kohës. Karli i Madh ia ktheu “favorin” duke i ofruar mbrojtje Leos nga kundërshtarët e tij dhe nëpërmjet vendimeve të tij, tokat papnore në gadishullin italian u rritën ndjeshëm.
Leo IV 847–855, vepra e tij e rëndësishme është fortifikimi i qytetit të Romës dhe lufta që ai shpalli kundër piratëve saraçenë.
Leo V 903 Papati i dytë më i shkurtër. Leo V qëndroi në fronin papnor vetëm për një muaj.
Leo VI 928, pak dihet për Leon VI, i cili gjithashtu pati një qëndrim shumë të shkurtër në krye të kishës katolike.
Leo VII 936–939 ishte kampion i përulësisë dhe mbështetës i flaktë i jetës monastike. Ai luajti një rol të rëndësishëm në Paqen me Hungarinë.
Leo VIII 963–965 për disa nuk konsiderohet Papë, por ishte kreu i doktrinës katolike për dy vite.
Leo IX (shën Leo IX) 1049–1054 është shenjti i dytë në listën e gjatë të Primatëve të Kishës Katolike që zgjodhën këtë emër të veçantë. Ai ishte një nga reformatorët strukturorë të doktrinës katolike dhe konsiderohet njeriu që nisi proceset që sollën Skizmin midis Kishave Lindore dhe Perëndimore.
Leo X 1513–1521 është Papë nga familja Medici që e përjashtoi Martin Luterin dhe mbikëqyri periudhën e hershme të Reformimit.
Leo XI i fronëzuar në prill 1605 qëndroi për 27 ditë. Është i njohur si “Papa Vetëtima” për shkak të papatit të tij jashtëzakonisht të shkurtër. Ai qëndroi në fronin papnor më pak se paraardhësi i tij i largët Leo V.
Leo XII 1823–1829 ishte Papë konservator, i cili kundërshtoi liberalizmin modern.
Leo XIII 1878–1903 është i famshëm për enciklikën Rerum Novarum mbi të drejtat e punëtorëve. Një mbrojtës i flaktë i të dobëtëve dhe punëtorëve. Për shumë njerëz, ai ka mbetur në histori si i vetmi “Papë komunist”.
Kursi i Papës së ri nuk do të përcaktohet nga emri që ai zgjedh, por është e njohur se zgjedhja e emrit nga secili Papë është një referencë specifike për të kaluarën kishtare katolike dhe një “shënim në fund të faqes” për rrugën që ai do të zgjedhë të ndjekë.
