Pavarësisht imazheve romantike të projektuara në mediat sociale, ekspertët paralajmërojnë se rreziqet janë reale dhe serioze.
Një trend i ri dhe shqetësues udhëtimesh duket se po fiton terren, pasi mijëra entuziastë të aventurës po zgjedhin një nga vendet më të paqëndrueshme dhe të rrezikshme në botë, Libinë për pushime, në një përpjekje për të krijuar përmbajtje origjinale dhe “autentike” për platforma si TikTok.
Libia, një vend në Afrikën e Veriut, i cili është në një gjendje paqëndrueshmërie politike, tani mirëpret rreth 90,000 turistë çdo vit. Pavarësisht konflikteve të armatosura të vazhdueshme dhe mungesës së kontrollit qendror, vendi ka filluar të tërheqë turistë që kërkojnë diçka më “autentike” sesa plazhet tipike mesdhetare, raporton Daily Mail.
Këta udhëtarë lënë rehatinë e hoteleve luksoze për të eksploruar rrënojat e lashta të Libisë dhe peizazhet mahnitëse të shkretëtirës, shpesh të shoqëruar nga truproja dhe duke kaluar nëpër pika kontrolli ushtarake, në një përvojë të përshkruar nga shumë si një “aventurë e vërtetë”.
Ndikimi nga TikTok
Mediat sociale kanë luajtur një rol kyç në këtë trend të ri, me video virale që shfaqin sharmin unik të Libisë, nga rrënojat e lashta të Leptis Magna deri te rrugët e zhurmshme të Tripolit.
Siç raportojnë mediat britanike, një shembull i turistëve të tillë është çifti Hudson dhe Emily, të cilët synojnë të vizitojnë çdo vend të botës. Ata e përfshinë Libinë midis vendeve që vizituan në vitin 2024, duke e përshkruar përvojën e tyre si “çuditërisht të sigurtë”.
“Truproja jonë ishte jashtëzakonisht i kujdesshëm. Ai madje na ndoqi deri në tualet”, i thanë ata gazetës Mirror. “Nuk e imagjinonim kurrë se do të ishim në gjendje të shihnim disa nga këto vende dhe ndihemi shumë mirënjohës.”
Megjithatë, pavarësisht imazheve romantike të projektuara në mediat sociale, ekspertët paralajmërojnë se rreziqet janë reale dhe serioze. Ministria e Jashtme e Mbretërisë së Bashkuar ka lëshuar paralajmërime të qarta për ata që po mendojnë të udhëtojnë në Libi, duke përmendur rrezikun e sulmeve terroriste, rrëmbimeve dhe konfliktit të armatosur.
Në një deklaratë të kohëve të fundit, FDCO paralajmëroi: “Sulmet mund të ndodhin edhe në vende të vizitueshme nga turistë të huaj. Qytetarët britanikë dhe perëndimorët e tjerë konsiderohen pengje me vlerë të lartë”.
Situata në Libi mbetet e paqëndrueshme, me përleshje të shpeshta midis grupeve të armatosura.
Pavarësisht rreziqeve të dukshme, disa turistë vazhdojnë të kërkojnë bukuritë e fshehura të vendit, siç janë rrënojat mbresëlënëse, vendet turistike “të fshehura” dhe peizazhet mahnitëse të shkretëtirës, të postuara në TikTok, që kanë me miliona shikime. Për shumë njerëz, Libia përfaqëson aventurën përfundimtare, një përvojë larg shtegut tradicional turistik. Megjithatë, ekspertët theksojnë se ata që zgjedhin të vizitojnë vendin duhet të jenë të përgatitur për çdo eventualitet, pasi situata mund të ndryshojë në mënyrë dramatike nga momenti në moment.
