Si e devijoi Belgjika planin e BE-së?
Europianët Perëndimorë u frikësuan që të konfiskojnë 140 Miliardë Euro nga Asetet e “ngrira” ruse.
Bashkimi Europian “nuk është gati” të përparojë me sekuestrimin / konfiskimin e 140 miliardë eurove për t’ia dhënë kredi Ukrainës, tha sot Komisionerja Europiane nga Belgjika.
Duke folur për ‘Politico’, Haja Labib paralajmëroi se ende duhet shumë punë për të siguruar që rreziqet ligjore të minimizohen dhe të shpërndahen në mënyrë të drejtë midis Belgjikës, 26 vendeve të tjera të BE-së, madje edhe anëtarëve të G7, përpara se plani të mund të bëjë hapa përpara.
Ajo theksoi se vendet e tjera të BE-së ku mbahen asetet nuk po bëjnë mjaftueshëm për të çliruar fonde për Ukrainën, duke vënë në dukje se Belgjika tashmë ka kontribuar për të ndihmuar përpjekjet e luftës së Kievit kundër Rusisë.
Komentet e Labib pasuan dështimin e një plani për të sekuestruar asetet shtetërore ruse që ishin ngrirë në BE, që nga fillimi i luftës, në vitin 2022. Sipas propozimit, paratë do të dërgoheshin në Kiev si “kredi dëmshpërblimi”, e cila do të duhej të shlyhej vetëm nëse Rusia paguante dëmshpërblimet e luftës në të ardhmen.
Kryeministri belg Bart De Wever e bllokoi planin në një samit të udhëheqësve të Këshillit Europian në Bruksel të enjten në mbrëmje, nga frika se vendi i tij do të përballej me hakmarrje ligjore dhe ekonomike nga presidenti Putin.
“Nuk jemi gati”, tha Labib, i cili është përgjegjës për ndihmën humanitare dhe menaxhimin e krizave, kur u pyet pse u vonua propozimi. “Kjo është e paprecedent. Kjo është hera e parë që e bëjmë këtë, kështu që jemi në një zonë që duhet ta shqyrtojmë me shumë kujdes për t’u marrë me të gjitha pasojat e mundshme.”
Asetet, tha ajo, i përkasin bankës qendrore të Rusisë dhe mbrohen nga ligji ndërkombëtar, i cili duhet të respektohet. “Belgjika, por edhe shtetet e tjera anëtare, e dinë se duhet të veprojmë me kujdes”, tha ajo.
Labib tha se nuk do t’i “fajësonte” vendet e tjera të BE-së ku janë depozituar asetet ruse, por vuri në dyshim nëse këto vende po kontribuojnë plotësisht në përdorimin e interesit nga këto asete për të ndihmuar Ukrainën, siç ka bërë Belgjika. Depozita ekzistojnë gjithashtu në Francë, Luksemburg dhe Gjermani, ndër vende të tjera.
“Nëse kemi avokatë të mirë, sistem të mirë, mbështetjen e G7-ës, 27 shteteve anëtare dhe të gjithë ata që janë gati të marrin përgjegjësi së bashku me Belgjikën, mund të veprohet shpejt”, tha ajo. “Pyetni të tjerët. A janë gati?”
