Presidenti i Ukrainës, Volodimir Zelenski, mbërriti në Paris të hënën, pas vizitës së tij në Athinë, me qëllim përfundimin e marrëveshjeve të rëndësishme me Francën për të forcuar aftësitë ushtarake të vendit të tij.
Bisedimet përqendrohen në furnizimin me sisteme kundërajrore, avionë luftarakë dhe raketa, mes përshkallëzimit të sulmeve ruse me dronë dhe raketa, si dhe progresit të raportuar të forcave ruse në rajonin e Zaporizhias.
Zelenski u takua me Presidentin Francez Emmanuel Macron në një përpjekje për të forcuar aftësitë afatgjata të forcës ajrore dhe mbrojtjes ajrore të Ukrainës. Në një postim në Platformën X të dielën, presidenti ukrainas foli për një “marrëveshje historike” me Francën, që do të përfshijë forcimin e forcës ajrore, aftësive mbrojtëse dhe sistemit të mbrojtjes ajrore të vendit të tij.
Mbërritja e Zelenskit në aeroportin ushtarak Villacoublay jashtë Parisit u prit me një ceremoni të ngrohtë nga Makron, duke shënuar fillimin e një raundi bisedimesh që synojnë adresimin e nevojave në rritje të Ukrainës. Një memorandum mirëkuptimi për mbështetje të mëtejshme ushtarake u nënshkrua në të njëjtën kohë, me detajet e marrëveshjeve që ende nuk janë njoftuar.
Parisi, pavarësisht pasigurive politike dhe fiskale, ka eksploruar mënyra për të forcuar mbrojtjen ajrore të Ukrainës për javë të tëra. Muajin e kaluar, Makron u zotua të furnizonte me avionë luftarakë shtesë Mirage, përtej gjashtë të premtuarve tashmë, si dhe një grup të ri raketash Aster 30 për sistemet SAMP/T, Ukrainën. Sipas burimeve të njohura me bisedimet, vizita e Zelenskit pritet të çojë në angazhime edhe më të mëdha, duke përfshirë një marrëveshje strategjike 10-vjeçare të mbrojtjes ajrore, për furnizimin e avionëve luftarakë shumërolësh Dassault Rafale.
Disa nga avionët mund të vijnë direkt nga stoqet franceze, ndërsa sasia kryesore do të përfshihet në një plan afatgjatë për të forcuar flotën e forcave ajrore ukrainase, e cila synon të arrijë 250 avionë luftarakë, duke përfshirë F-16 amerikanë dhe Gripen suedezë. Integrimi i avionëve të përparuar do të kërkojë trajnim të pilotëve dhe kohë për gatishmëri operacionale.
Në të njëjtën kohë, vizita mund të çojë në marrëveshje për furnizimin e sistemeve shtesë SAMP/T, qoftë nga stoqet ekzistuese franceze ose përmes porosive të reja, duke përfshirë raketat dhe teknologjinë anti-dronë. Mënyrat e financimit të këtyre furnizimeve shtesë nuk janë sqaruar ende.
Në një konferencë për shtyp para mbërritjes së Zelenskit, zyra e Makron tha se qëllimi i bisedimeve ishte “të vinte njohuritë franceze të mbrojtjes në shërbim të mbrojtjes së Ukrainës” dhe t’i lejonte asaj të fitonte sistemet që i nevojiten për t’iu kundërvënë agresionit rus. Zelenski do të marrë pjesë gjithashtu në prezantime nga prodhuesit kryesorë të mbrojtjes, përfshirë Dassault, përpara se të nënshkruante dokumentat e qëllimit dhe kontratat, më vonë gjatë ditës.
Pasdite, do të mbahet një forum i veçantë për kompanitë ukrainase dhe franceze të dronëve, që synon forcimin e bashkëpunimit dhe zhvillimin e teknologjive të reja. Franca, së bashku me Mbretërinë e Bashkuar, po mbështet idenë e krijimit të një koalicioni prej rreth 30 vendesh që do të ishin të gatshme të ofronin trupa brenda Ukrainës, ose në kufijtë e saj perëndimorë, sapo të arrihet një marrëveshje paqeje me Rusinë.
