Zëvendëskryetari i Këshillit të Sigurisë Ruse dhe kryetari i partisë Rusia e Bashkuar, Dmitri Medvedev, tha se përpjekjet e BE-së për të përdorur asetet e ngrira ruse mund të kenë pasoja serioze, shkruan serbja “b92” duke cituar agjencinë e lajmeve Tanjug.
Sipas tij, fondet ruse mund të kthehen përmes “kompensimit real”.
“Nëse Bashkimi Europian përpiqet të vjedhë asetet ruse të ngrira në Belgjikë duke lëshuar një të ashtuquajtur kredi dëmshpërblimi, veprime të tilla mund të karakterizohen si një lloj i veçantë i ‘casus belli’, me të gjitha pasojat për Brukselin dhe vendet e BE-së.
Kthimi i fondeve mund të bëhet jo përmes gjykatave, por përmes dëmshpërblimeve reale që armiqtë e Rusisë do t’i paguanin në natyrë”, tha Medvedev në platformën “Max”, sipas RIA Novosti.
Komisioni Europian po shqyrton përdorimin e aseteve ruse me vlerë midis 185 dhe 210 miliardë euro si kredi për Ukrainën, me kusht që të shlyhet pas përfundimit të konfliktit.
Ministria e Jashtme ruse e hodhi poshtë idenë e Rusisë për të paguar dëmshpërblime, duke e quajtur atë “jo realiste”.
Që nga fillimi i luftës në Ukrainë, BE-ja dhe vendet e G7-ës kanë ngrirë rreth 300 miliardë euro rezerva ruse të arit dhe valutave të huaja, nga të cilat më shumë se 200 miliardë euro mbahen në BE, përfshirë 180 miliardë euro në Euroclear të Belgjikës.
Komisioni Europian transferoi 18.1 miliardë euro në Ukrainë nga të ardhurat e aseteve të ngrira të Rusisë midis janarit dhe nëntorit.
Megjithatë, Belgjika ka theksuar vazhdimisht se nuk do t’i përdorë asetet e ngrira pa garancitë e BE-së.
Kryeministri belg Bart de Wever dhe Ministri i Mbrojtjes dhe Tregtisë së Jashtme Theo Francken theksuan se nevojiten garanci konkrete dhe të besueshme përpara se plani i Komisionit Europian të mund të zbatohet.
