Përfaqësojnë 420 milionë qytetarë!
Pesë qeveri në Amerikën Latine, Brazili, Kili, Kolumbia, Meksika, Uruguai, si dhe Spanja, lëshuan sot një deklaratë të përbashkët duke hedhur poshtë “çdo përpjekje për të kontrolluar” Venezuelën, një ditë pas operacionit ushtarak amerikan dhe duke kërkuar lirimin e udhëheqësit të vendit, Maduro.
Gjashtë vendet shprehën shqetësimin e tyre për stabilitetin rajonal pas sulmeve ajrore të ushtrisë amerikane dhe arrestimit të Presidentit Nicolas Maduro dhe Zonjës së Parë Celia Flores, të cilët u transferuan në SHBA dhe pritet të gjykohen të hënën në New York me akuzat për “narkoterrorizëm”.
Kryeministri spanjoll Pedro Sanchez tha në një postim se “situata në Venezuelë duhet të zgjidhet ekskluzivisht me mjete paqësore, përmes dialogut, negociatave dhe respektimit të vullnetit të popullit venezuelian në të gjitha shprehjet e tij, pa ndërhyrje të jashtme dhe në përputhje me të drejtën ndërkombëtare”.
Ai vuri në dukje se “qeveria e Spanjës, së bashku me qeveritë e Brazilit, Kilit, Kolumbisë, Uruguait dhe Meksikës, shprehin me këtë deklaratë shqetësimin tonë për ngjarjet që kanë ndodhur në Venezuelë” dhe publikoi një link për deklaratën e përbashkët.
“Ne shprehim shqetësimin tonë kundër çdo përpjekjeje për kontroll qeveritar, administrim ose pronësi të huaj të burimeve natyrore ose strategjike” të Venezuelës, thuhet në deklaratën e lëshuar nga Ministria e Jashtme kolumbiane.
Presidenti i SHBA-ve, Donald Trump, tha të shtunën se do t’u lejonte kompanive amerikane të naftës të shfrytëzonin burimet e naftës së Venezuelës, e cila mban 20% të rezervave të naftës bruto në botë.
Ai gjithashtu deklaroi se Shtetet e Bashkuara “do të administrojnë vendin derisa të mund të ecim përpara me një tranzicion të sigurtë, të përshtatshëm dhe të kujdesshëm”.
