Një paralajmërim i qartë dhe i ashpër iu dha Shteteve të Bashkuara nga Udhëheqësi Suprem i Iranit, Ajatollah Ali Khamenei, duke deklaruar se një sulm amerikan ndaj Republikës Islamike nuk do të kufizohet në një incident të izoluar, por do të zhvillohet në një luftë më të gjerë rajonale.
“Amerikanët duhet ta dinë se nëse zgjedhin të fillojnë një luftë, këtë herë konflikti do të marrë dimensione rajonale”, thuhet se tha Khamenei, në një nga deklaratat e tij më të drejtpërdrejta dhe kërcënuese deri më sot.
Deklaratat e udhëheqësit 86-vjeçar vijnë në një kohë tensionesh të larta dhe u shoqëruan me një paralajmërim nga Teherani se nëse Donald Trump urdhëron sulme ushtarake kundër Iranit, përgjigja do të përfshijë sulme si ndaj Izraelit, ashtu edhe ndaj objektivave ushtarake amerikane në të gjithë Lindjen e Mesme.
Në të njëjtën kohë, presidenti amerikan u duk më i përmbajtur, duke deklaruar se Irani është “në bisedime serioze” me Uashingtonin, pa zbuluar detaje të mëtejshme. “Ata po flasin me ne dhe do të shohim nëse mund të bëjmë diçka”, tha ai për Fox News, ndërsa nënvizoi gjithashtu praninë e konsiderueshme ushtarake amerikane në rajon, me disa anije luftarake tashmë në Gjirin Persik.
Pavarësisht dritares së dialogut që Trump po e lë të hapur, Axios raportoi dy ditë më parë se Ministri i Mbrojtjes së Arabisë Saudite, Princi Khalid bin Salman, tha në një konferencë private në Uashington se nëse presidenti amerikan nuk i zbaton kërcënimet e tij kundër Iranit, regjimi iranian mund të dalë më i fortë nga kriza.
Sipas medias amerikane, ky qëndrim shënon një ndryshim të dukshëm në qëndrimin saudit, pasi deri vonë Riadi kishte paralajmëruar për rreziqet e përshkallëzimit të mëtejshëm ushtarak.
Vetëm tre javë më parë, Princi i Kurorës Mohammed bin Salman i kishte shprehur shqetësime të forta Trump-it në lidhje me rrezikun e luftës, duke kontribuar, sipas raportimeve, në vendimin e presidentit amerikan për të vonuar një sulm të mundshëm.
Ministri saudit i mbrojtjes, një bashkëpunëtor i ngushtë dhe vëllai më i vogël i princit të kurorës, vizitoi Uashingtonin mes skenarëve të veprimeve ushtarake amerikane kundër Iranit, me Teheranin që kërcënoi hapur me hakmarrje “të paprecedent”.
Edhe pse Trump ka urdhëruar një grumbullim masiv ushtarak të forcave amerikane në Gjirin Persik, Shtëpia e Bardhë këmbëngul se nuk është marrë asnjë vendim përfundimtar dhe se kanalet diplomatike mbeten të hapura.
Zyrtarët amerikanë vënë në dukje se deri vonë Arabia Saudite kishte ushtruar presion të madh mbi Uashingtonin për të shmangur një sulm kundër Iranit. Një shpjegim i mundshëm për ndryshimin e qëndrimit është vlerësimi i Riadit se Trump tashmë e ka vendosur dhe nuk dëshiron të shfaqet si një forcë që kundërshton hapur zgjedhjet amerikane.
Ajo që do të ndodhë në Iran, duket se do të jetë e para në histori, për nga përmasat dhe strategjia e sulmit.
