Përdoret inteligjenca artificiale dhe përdoret metoda e imazhit të rezonancës magnetike funksionale (fMRI).
Shkencëtarët në Japoni kanë krijuar një makinë që përdor inteligjencën artificiale dhe mund të “lexojë” ëndrrat e njerëzve, të cilat më pas i regjistrojnë.
Makina u quajt “Dream Machine” dhe përdor metodën funksionale të rezonancës magnetike (fMRI).
U krijua në vitin 2013 dhe dallohet nga pajisjet e ngjashme, sepse përdor modelin e inteligjencës artificiale AI Stable Diffusion, shkruan PC Guide.
Hulumtimi i lidhur u botua në revistën shkencore Science dhe raportoi se regjistrimi i ëndrrave ishte bërë me një teknikë jo invazive, të përdorur për të matur dhe hartuar aktivitetin e trurit.
Kështu, shkencëtarët i nënshtruan 200 njerëz në një elektroencefalogramë dhe më pas i vunë në gjumë.
Falë tomografit të trurit ata regjistruan aktivitetin e trurit gjatë ëndrrës dhe kur njerëzit u zgjuan u duhej të përshkruanin ëndrrën që panë, ku objektet që përmendën u grupuan në 20 kategori bazë, si meshkuj apo femra, ndërsa ekspertët vazhduan monitorimin e aktivitetit të trurit.
Ajo që u zbulua ishte se aktiviteti i trurit i lidhur me një objekt të veçantë ndryshonte nga personi në person. Megjithatë, ata të gjithë përjetuan të njëjtin aktivitet të trurit kur mendonin për të njëjtin objekt, pavarësisht nëse ishin në gjumë apo zgjuar.
Matjet ishin 60% të suksesshme dhe më pas makinës iu desh t’i rreshtonte ato për të përfaqësuar një ëndërr, por jo si imazh.
Sipas një raporti nga faqja e internetit që kontrollon lajmet Snopes, rezultati nuk është një regjistrim video i drejtpërdrejtë i ëndrrës në kuptimin e zakonshëm, as nuk është një regjistrim narrativ.
Në vend të kësaj, programi i inteligjencës artificiale vendos në rregull aktivitetin e trurit, duke treguar pak a shumë kohëzgjatjen e ëndrrës.
Më pas, për shkak se matje të caktuara shoqërohen me imazhe të caktuara, nxirret një përfundim përkatës për atë që njeriu pa në gjumë.
“Ne po deshifrojmë aktivitetin e trurit dhe impulset nervore në ëndrra”, tha një shkencëtar i përfshirë në studim, duke theksuar se ai shpreson të hapë rrugë të reja për të kuptuar sesi funksionon truri.
