Çfarë tha ai për Libanin?
Një ditë pasi i bëri thirrje OKB-së që “të përdorë forcën” kundër Izraelit, presidenti turk Rexhep Tajip Erdogan nga foltorja e Parlamentit turk dje, akuzoi sërish Izraelin se e ka tërhequr rajonin në një luftë rajonale, madje duke pretenduar se Izraeli do të shënjestrojë Turqinë dhe do ta sulmojë pas Libanit.
“Ndërsa Izraeli po kryen sulme terroriste në Liban, ai po tenton të gjitha llojet e provokimeve për të tërhequr shtetet e rajonit në zjarrin e tij. Pas Libanit, vendi tjetër ku ai (Izraeli) do t’i kthejë sytë, ju them qartë, do të jetë atdheu ynë… Ëndrrat e Netaniahut përfshijnë Anadollin”, tha Erdogan.
“Ajo me të cilën kemi të bëjmë nuk është një shtet, por një tufë vrasësish që ushqehen me gjak. Jemi përballë një rrjeti pushtues që synon të djegë të gjithë rajonin. Askush me një grimë ndërgjegje nuk mund të heshtë përballë një rrjeti të tillë therjesh. Ata që heshtin, si do t’i shikojnë në sy fëmijët tuaj nesër? Agresioni i Izraelit përfshin edhe Turqinë. Ne do të vazhdojmë të qëndrojmë kundër këtij agresioni me të gjitha mjetet që kemi, për vendin dhe pavarësinë tonë”, shtoi ai.
“Cilado që të jetë kostoja, Turqia do të vazhdojë të qëndrojë kundër Izraelit dhe do ta thërrasë botën në këtë qëndrim të nderuar. Turqia do të bëjë gjithçka që mundet për të krijuar një front humanitar… Çfarëdo që të bëjë Izraeli, herët a vonë ata do ta bllokojnë. Ashtu siç (ndaluan) Hitlerin, Netaniahu do të ndalohet në të njëjtën mënyrë”, tha presidenti turk në pjesë të fjalimit të tij.
