“Për shumë vite, Kimberly ka qenë një mike dhe aleate e ngushtë”, tha presidenti amerikan në një deklaratë të tij.
Donald Trump ka emëruar ish prezantuesen e Fox News, Kimberly Guilfoyle për ambasadore të SHBA-ve në Greqi.
Në më të paktën, ky është një ndryshim i madh përsa i përket ambasadës amerikane në Greqi, pasi superfuqia nuk është përfaqësuar kurrë kaq “dinamikisht”.
Ajo është aktive në Instagram dhe në rininë e hershme ishte edhe modele.
“Përvoja dhe lidershipi i saj i gjerë në drejtësi, media dhe politikë, së bashku me intelektin e saj të mprehtë, e bëjnë atë jashtëzakonisht të kualifikuar për të përfaqësuar Shtetet e Bashkuara dhe për të mbrojtur interesat e saj jashtë vendit”, thotë Trump.
Emërimi i Guilfoyle do të kërkojë konfirmimin e Senatit.
Pas njoftimeve zyrtare të Donald Trump, Guilfoyle shkroi në rrjetet sociale:
“Është nder i madh të pranoj përzgjedhjen e Presidentit Trump për të shërbyer si ambasadore e ardhshme në Greqi dhe pres me padurim të fitoj mbështetjen e Senatit të SHBA.
Fitorja historike e Presidentit Trump sjell shpresë dhe optimizëm për popullin amerikan dhe aleatët liridashës në mbarë botën.
Ishin vlerat demokratike të lindura në Greqi që ndihmuan në formimin e themelimit të Amerikës.
Dhe tani, ne kemi mundësinë ta nderojmë këtë histori duke sjellë ditë më të mira këtu në vendin tonë, por edhe jashtë tij.
Si ambasador, pres me padurim zbatimin e axhendës së Trump, mbështetjen e aleatëve tanë grekë dhe fillimin e një epoke të re paqeje dhe prosperiteti.”
Kush është Kimberly Guilfoyle?
Kimberly Guilfoyle është një ish prezantuese e Fox News 55-vjeçare, e cila udhëtoi nëpër Amerikë në prag të zgjedhjeve për të mbledhur para për fushatën e presidentit të zgjedhur. Ajo foli gjithashtu në konventën republikane në korrikun e kaluar.
Është avokate dhe më herët në karrierën e saj dhe para se të kthehej në televizion, ajo shërbeu si prokurore në qarku e Kalifornisë.
Ka qenë e martuar me guvernatorin e Kalifornisë, Gavin Newsom, me të cilin është divorcuar dhe më parë ishte në lidhje me Donald Trump Jr.
Natën e zgjedhjeve, Guilfoyle u shfaq në skenë me familjen Trump.
Trump zgjedh njerëz nga rrethi i tij i ngushtë, pasi kuptoi që nga mandati i tij i parë presidencial se është shumë e rëndësishme që ata që zënë poste të rëndësishme, të kenë besim absolut.
Ai zgjodhi Charles Kushner, babain e dhëndrit të tij, për të shërbyer si ambasador në Francë dhe ka emëruar vjehrrin e Tiffany Trump si këshilltar për Lindjen e Mesme.
