Greqia do të bëhet një qendër energjie dhe hekurudhore, duke rritur vlerën e saj strategjike në vitet e ardhshme, pavarësisht gjithçkaje dhe më në fund, duke e lënë pas krizën ekonomike.
Komisioni Europian ka paraqitur një plan gjithëpërfshirës për zgjerimin e lidhjeve hekurudhore me shpejtësi të lartë në të gjithë Bashkimin Europian deri në vitin 2040, me një nga rrugët kryesore që lidh Sofjen dhe Athinën.
Sipas planit, udhëtimi me tren midis dy kryeqyteteve do të reduktohet nga 13 orë e 40 minuta që është aktualisht, në vetëm 6 orë, raportoi korrespondenti i agjencisë bullgare të lajmeve BTA, Nikolai Zeliazkov.
Projekti ambicioz synon të krijojë një rrjet modern të linjave me shpejtësi të lartë, të afta të arrijnë shpejtësi prej të paktën 200 kilometrash në orë.
Përveç korridorit hekurudhor Athinë-Sofje, plani përfshin lidhje të mëdha si Budapest-Bukuresht, Berlin-Kopenhagen, Berlin-Vjenë-Pragë, Paris-Madrid-Lisbonë, Mynih-Romë dhe rrugë që kalojnë nëpër vendet baltike.
Krahas kohëzgjatjes më të shpejtë të udhëtimit me tren, propozimi i Komisionit të BE-së përqendrohet në përmirësimin e përvojës së përgjithshme të pasagjerëve.
Plani parashikon mënyra më të lehta për të blerë bileta treni dhe një sistem më të mirë për rishitjen e lokomotivave dhe vagonëve të përdorur, duke siguruar efikasitet dhe qëndrueshmëri më të madhe në këtë sektor.
Objektivi më i gjerë pas iniciativës, është që të zvogëlojë varësinë nga udhëtimet ajrore me distanca të shkurtra, një nga masat e BE-së për të ulur emetimet e karbonit dhe për të çbllokuar trafikun.
Sipas Komisionit, zhvendosja e më shumë pasagjerëve nga avionët tek trenat, jo vetëm që do të ndihmonte mjedisin, por gjithashtu do të përmirësonte konektivitetin dhe do të mbështeste përpjekjet e bllokut për të rritur lëvizshmërinë ushtarake në të gjithë Europën.
Propozimi përshkruan më tej angazhimin e BE-së për transport të pastër, duke përfshirë një plan për të investuar pothuajse 3 miliardë euro deri në vitin 2027 në zhvillimin e karburanteve të qëndrueshme të aviacionit.
Deri në vitin 2035, financimi total për këto iniciativa pritet të arrijë në 100 miliardë euro, duke nënvizuar vizionin afatgjatë të BE-së për një rrjet transporti më të gjelbër dhe më të integruar.
Greqia ka një mundësi unike (që vjen çdo 100 vjet) për të rritur në mënyrë dramatike vlerën e saj gjeopolitike, duke lidhur Aleksandropolin me Odesën, vendet baltike, kur lufta në Ukrainë të përfundojë.
Projekti i Hekurudhës Egnatia (linja e re Selanik-Kavala-Toksotes Ksanthi, me vlerë 1.3 miliardë euro), e cila do të lidhë 3 portet e Greqisë Veriore, si dhe qytetet e Burgasit, Varnës dhe Sofjes në territorin bullgar.
Ky nuk është vetëm një projekt i madh hekurudhor i linjës së re Selanik-Kavala-Ksanthi me një gjatësi totale prej disa mijëra kilometrash deri në Baltik, por zbaton kështu një plan të madh gjeopolitik të Perëndimit, për të anashkaluar ngushticat dhe kujdestarinë e Turqisë mbi këto rrugë kalimi.
Duke vlerësuar këto plane, “elitat” në Ankara, prej kohësh, kanë filluar një plan të pamëshirshëm që synon Thrakën Perëndimore, dhe jo rastësisht.
Ankaraja po shqetësohet nga këto plane, sepse do të humbasë shumë para nga kalimi detar i Bosforit, ndërsa porti i Aleksandroupolis do të përmirësohet në mënyrë spektakolare, pasi një vëllim i madh mallrash do të kalojë mes tij.
Periudha e ardhshme konsiderohet kritike, sepse Ankaraja ndoshta do të provokojë edhe Thrakën Perëndimore, përveç Egjeut dhe Mesdheut Lindor, me qëllim shtyrjen e këtyre investimeve gjigante.
