“Bashkimi Europian nuk mund t’i japë më kredi Zelenskit”, tha Komisioneri Europian për Financat!
Komisioneri Europian për Financat ka theksuar se Bashkimi Europian nuk mund të vazhdojë t’i japë hua Ukrainës, ndërsa shqetësimet rriten në lidhje me aftësinë e Kievit për të shlyer borxhin.
Tani europianët po e kuptojnë se me kë kanë të bëjnë!
BE-ja nuk ka më hapësirë për mbështetje financiare shtesë për Ukrainën, paralajmëroi Valdis Dombrovskis, duke vënë në dukje se vendi përballet me një “boshllëk të konsiderueshëm financimi” dhe se vazhdimi i huamarrjes mund të rrezikojë qëndrueshmërinë e borxhit të saj publik.
Në një konferencë për shtyp në Bruksel, Dombrovskis theksoi se e vetmja zgjidhje e mundshme për të ruajtur flukset financiare në Kiev, ishte përdorimi i fondeve të ngrira ruse. Ky propozim bie ndesh me propozimet e Komisionit për huamarrje përmes mekanizmave të përbashkët europianë, ose granteve dypalëshe nga shtetet anëtare.
Plani parashikon që fondet e “ngrira” do t’i ofrohen Ukrainës në formën e një kredie, e cila do të shlyhet vetëm nëse Rusia paguan dëmshpërblimet e luftës në të ardhmen. Megjithatë, kjo iniciativë përballet me pengesa serioze ligjore dhe financiare, kryesisht nga Belgjika, ku ndodhet vëllimi më i madh i rezervave të ngrira ruse, në institucionin financiar Euroclear. Nga afërsisht 300 miliardë dollarë që janë ngrirë që nga viti 2022, afërsisht 200 miliardë janë në Euroclear në Belgjikë.
Banka Qendrore Europiane dhe vende të tilla si Franca kanë shprehur gjithashtu rezerva, duke paralajmëruar se Europa mund të shkelë rregullat ndërkombëtare dhe të ekspozohet ndaj kompensimit të mundshëm nga Rusia, e cila e ka karakterizuar të gjithë iniciativën si “vjedhje” dhe nuk përjashton mundësinë e përdorimit të gjykatave ndërkombëtare.
Në Samitin e fundit të BE-së, udhëheqësit e BE-së nuk arritën të bien dakord për një plan kredie prej 140 miliardë eurosh, duke përdorur fonde të ngrira ruse. Komisioni Europian po përpiqet të bindë shtetet anëtare kundërshtare se pa përdorimin e fondeve ruse, mbështetja për Ukrainën do të vendoste një barrë të konsiderueshme në buxhetet kombëtare dhe do të çonte në një rritje të borxhit publik.
Analistët ekonomikë vlerësojnë se Ukrainës do t’i duhen rreth 100 miliardë euro në vit për katër vitet e ardhshme, ndërsa Komisioni vlerësoi në një dokument të paraqitur udhëheqësve të BE-së se, shërbimi i një kredie të tillë mund të kushtojë deri në 5.6 miliardë euro në vit në interesa.
