Mijëra qytetarë dolën në rrugë kundër politikave të sigurisë së qeverisë.
Forcat e sigurisë përdorën gaz lotsjellës për të shpërndarë protestuesit.
Mijëra njerëz demonstruan të shtunën në Mexico City dhe disa qytete të tjera në të gjithë vendin, kundër krimit dhe politikave të sigurisë së qeverisë. Protestat u organizuan nga “Lëvizja Sombrero”, e themeluar nga kryetari i bashkisë së Uruapanit i vrarë së fundmi, Karlos Manzo, si dhe nga organizata rinore.
Shumë protestues mbanin kapele që të kujtonin atë që kishte bërë Manzo, i cili u vra më 1 nëntor për aktivitetin e tij kundër krimit të organizuar.
Të premten, e veja e Manzos dhe kryetari aktual i bashkisë së Uruapanit, Grecia Quiros, u distancua nga “Lëvizja Sombrero” dhe nuk mori pjesë në demonstrata, pavarësisht jehonës së madhe që ato kishin në shoqërinë meksikane.
Po atë ditë, presidentja meksikane Klaudia Sheinbaum kritikoi thirrjet për pjesëmarrje masive, duke pretenduar se protestat po sponsorizoheshin nga “qendra të huaja” që kërkojn të destabilizojnë qeverinë. Ky qëndrim shkaktoi reagime negative, veçanërisht midis të rinjve që përbënin një pjesë të madhe të protestuesve.
Slogane të tilla si “Ne të gjithë jemi Karlos Manzo” dhe “Drejtësi për Karlos” dominuan rrugët. Banderolat shoqëroheshin nga flamuri ikonik i piratëve nga seriali japonez One Piece, i cili është bërë simbol i mobilizimeve rinore në të gjithë botën.
Tensionet arritën kulmin jashtë pallatit presidencial kur protestuesit rrëzuan barrierat metalike të ngritura nga policia. Forcat e sigurisë u përgjigjën me përdorim të gazit lotsjellës për të shpërndarë turmën. Protestuesit i thërrisnin policisë se “duhet ta kishit mbrojtur kështu edhe Karlos Manzon”, duke akuzuar autoritetet se nuk kishin ndërmarrë veprime të mjaftueshme kundër krimit.
Presidentja Sheinbaum, e cila ka qenë në pushtet që nga tetori i vitit 2024, është kritikuar gjithnjë e më shumë për politikën e saj të sigurisë. Vrasja e zyrtarëve, më e rëndësishmja ajo e Manço në Miçoakan, ka rritur shqetësimin publik dhe ka ringjallur debatin mbi efektivitetin e mekanizmave shtetërorë kundër krimit të organizuar.
