Po kërkojnë alternativa!
Bashkimi Europian duhet të shtojë përpjekjet e tij për të diversifikuar dhe zvogëluar varësinë e tij nga gazi natyror i lëngshëm (LNG) amerikan, pas kërcënimeve të Presidentit të SHBA-ve Donald Trump për të marrë kontrollin e Groenlandës, tha të mërkurën shefi i energjisë i BE-së, Dan Jorgensen.
Duke i quajtur ngjarjet e ditëve të fundit një “shenjë të qartë paralajmëruese”, Jorgensen tha se rritja e paqëndrueshmërisë gjeopolitike, nga lufta e Rusisë në Ukrainë, deri në tensionet në rritje me Uashingtonin, tregon se BE-ja nuk mund të supozojë më se marrëdhëniet e saj energjetike janë imune ndaj goditjeve të sigurisë.
“Këto janë kohë shumë të turbullta”, u tha Jorgensen gazetarëve gjatë një konference për shtyp në Bruksel.
“Ajo që e ka bërë situatën më serioze dhe të ndërlikuar janë marrëdhëniet e tensionuara me SHBA-të dhe fakti që kemi një president amerikan që nuk e përjashton përdorimin e forcës kundër Groenlandës”, shtoi ai.
SHBA-të tashmë furnizojnë më shumë se një të katërtën e gazit natyror të BE-së, nga vetëm 5% që furnizonin pesë vite më parë, me varësinë që pritet të rritet më tej ndërsa hyn në fuqi një ndalim i plotë i gazit rus.
Në kërkim të furnizuesve alternativë!
Megjithatë, Jorgensen tha se Komisioni tani po kërkon në mënyrë aktive furnizues alternativë jashtë SHBA-ve dhe planifikon të thellojë lidhjet energjetike me një numër vendesh në muajt e ardhshëm, duke përfshirë Kanadanë, Katarin dhe Algjerinë.
“Patjetër Kanadaja, Katari, vendet e Afrikës së Veriut”, tha ai, duke shtuar se Brukseli po punon gjithashtu për të siguruar burime jo ruse të karburantit bërthamor për shtetet anëtare që ende varen nga Moska.
Ndërkohë, ndërsa theksoi se Brukseli nuk dëshiron një luftë tregtare me Uashingtonin, Jorgensen pranoi shqetësimin në rritje brenda BE-së se ekziston rreziku i “zëvendësimit të një varësie me një tjetër” pas kalimit të shpejtë nga gazi rus, në gazin natyror të lëngshëm amerikan (LNG) pas pushtimit të Ukrainës nga Moska.
“Nuk ka qenë kurrë politika jonë që të zvogëlojmë tregtinë me SHBA-të dhe ne nuk duam konflikte tregtare”, tha ai. “Por është gjithashtu e qartë se trazirat gjeopolitike… kanë qenë një thirrje zgjimi. Ne duhet të jemi në gjendje të kujdesemi për veten tonë.”
Komisioneri vuri në dukje se ende nuk kishte folur me homologun e tij amerikan pas deklaratave të Trump për Groenlandën dhe shtoi se BE-ja nuk ka vendosur një kufi zyrtar se sa gaz natyror i lëngshëm amerikan do të konsiderohej i tepërt.
