Video-bombë që shënjestron zyrtarët e PLA-së mes spastrimit të Xi-së.
Në një veprim me implikime të qarta gjeopolitike, Agjencia Qendrore e Inteligjencës e SHBA-ve ka publikuar një video rekrutimi në gjuhën kineze, që synon kryesisht zyrtarët e PLA-së dhe zyrtarët e qeverisë kineze.
Video e titulluar “Shpëtoni të Ardhmen”, është vazhdim i një iniciative të ngjashme të nisur nëntë muaj më parë. Drejtori i CIA-s John Ratcliffe, tha se fushata e mëparshme në gjuhën mandarine pati një ndikim të rëndësishëm, duke arritur – siç tha ai – shumë qytetarë kinezë.
“Ne e dimë se ka shumë njerëz në Kinë që kërkojnë një mënyrë të përmirësuar jetese dhe duan të kontribuojnë në ndryshime pozitive për vendin e tyre”, tha Ratcliffe, duke shtuar se agjencia do të vazhdojë t’u ofrojë zyrtarëve dhe qytetarëve kinezë mundësinë për të punuar së bashku “për një të ardhme më të mirë”.
Përmbajtja e videos është veçanërisht e mprehtë. Narrativa tregohet nga perspektiva e një oficeri ushtarak kinez të nivelit të mesëm të frustruar, i cili shpreh pakënaqësi të fortë me udhëheqjen e Partisë Komuniste. Mesazhi i tij argumenton se udhëheqësit janë të interesuar vetëm në ruajtjen e privilegjeve të tyre, se karrierat e tyre janë ndërtuar mbi një “themel gënjeshtrash” dhe se ata me aftësi udhëheqëse shihen si kërcënim dhe lihen mënjanë.
Narrativa përforcohet nga konteksti i fundit politik dhe ushtarak në Kinë. Vetëm dy javë para publikimit të videos, Gjenerali Zhang Yuxia u shkarkua nga posti i tij për akuza për korrupsion, në një nga spastrimet e profilit të lartë në krye të ushtrisë kineze, që nga koha e Mao Ce Dunit. Kjo kohë i jep peshë të veçantë mesazhit të CIA-s, i cili duket se synon kuadro të pakënaqura brenda sistemit.
Publikimi i videos është pjesë e një konteksti më të gjerë të konkurrencës në rritje midis Uashingtonit dhe Pekinit, në të cilin operacionet e ndikimit dhe agjencitë e inteligjencës luajnë një rol gjithnjë e më të spikatur.
