Thrileri në Islamabad ka mbaruar në mënyrën më të dhimbshme dhe bota tani po mban frymën, duke pritur të shohë nëse armëpushimi do të mbahet, apo nëse do t’i dorëzohemi përsëri flakëve.
Misioni diplomatik që e gjithë bota po e shikonte me padurim u shemb si një kullë rëre.
Zëvendëspresidenti amerikan, JD Vance, u largua nga Pakistani në orët e para të së dielës, duke lënë pas një boshllëk plot kërcënime dhe pasiguri.
Pas 21 orësh bisedimesh të lodhshme dhe dramatike, shpresa për t’i dhënë fund luftës në Lindjen e Mesme duket se është shuar përgjithmonë.
Pak para se avioni i tij të ngrihej, Vance u shfaq para gazetarëve me një ton të ashpër dhe të pakthyeshëm.
“Po kthehemi në shtëpi pa një marrëveshje”, deklaroi ai, duke zbuluar se Uashingtoni kishte paraqitur “ofertën e fundit dhe më të mirë” që mund të bënte.
Zëvendëspresidenti nuk e fshehu zhgënjimin e tij, duke kritikuar refuzimin e Teheranit për t’u zotuar në mënyrë të qartë për të braktisur përgjithmonë programin e tij bërthamor. Në një fjalim plot paralajmërime, Vance shtoi se ky dështim do t’i kushtonte Iranit shumë më tepër sesa Shteteve të Bashkuara, duke theksuar se “vijat e kuqe” amerikane mbeten të panegociueshme.
Zemërimi i Teheranit: “Kërkesat janë absurde”!
Nga ana tjetër, televizioni shtetëror iranian IRIB transmetoi një pamje krejtësisht të ndryshme, plot hidhërim dhe akuza. Delegacioni iranian pretendoi se negocioi “deri në pikën e fundit” për të mbrojtur interesat e popullit të tij, por u përball me një mur “kërkesash irracionale dhe të pajustifikuara” nga pala amerikane.
