“Heshtje Fajtori” nga gjermanët! -“Për bashkëbisedime në nivel shërbimesh nuk japim informacion.”
Gjermanët shkojnë drejt idesë së bashkëshfrytëzimit të Egjeut, nga ana tjetër qeveria greke po fsheh shumë informacion mbi lëvizjet prapa skenës politike dhe populli është në terr informativ. Thuajse askush nuk di asgjë.
Sipas “Deutsche Welle”, Berlini nuk ka predispozicionin të japë informacion për takimin e këshilltarit për çështje të politikës së jashtme të Kancelares Merkel, me përfaqësuesin turk të presidentit Erdogan Ibrahim Kalin, si dhe përgjegjësen për çështjet europiane të qeverisë greke Eleni Sourani (ish ambasadore e Greqisë në Tiranë), takim që u realizua në Berlin të Gjermanisë.
Në një deklaratë me shkrim për “Deutsche Welle”, përfaqësues i qeverisë gjermane nënvizoi se “për shkaqe parimore nuk komentojmë asnjë lloj takimi të Kancelarisë në nivel shërbimesh”.
Gjermanët në dukje “e shesin” takimin si diçka rutinore, por informacionet nga disa burime greke dhe gjermane thonë për Mediat prestigjioze europiane se po bëhen negociata të fshehta, marrëveshje sekrete, që kanë për synim bashkëmenaxhimin e Egjeut mes Turqisë dhe Greqisë. Gjithçka mbahet hermetike, asgjë nuk bëhet publike, pasi pritet reagim shumë i madh nga populli grek, nëse Qeveria Mitsotaki merr ndonjë vendim të dyshimtë, të paduhur dhe që mund të cënojë direkt apo indirekt interesat dhe sovranitetin e vendit.
Pas takimit të zhvilluar nga përfaqësuesit e tre vendeve, Kancelarja Merkel ka patur një bisedë të gjatë telefonike me Kryeministrin Mitsotakis, një bisedë që bëhet edhe pak ditë përpara takimit të Këshilit Europian, të datave 17 dhe 18 Korrik.
Asgjë nuk ndodh rastësisht dhe pa shkak.
Por një gjë deri për momentin është e sigurtë, që Berlini po ushtron presion mbi Athinën për zgjidhje me kompromis të çështjes që ka hapur pala turke, që përkthehet në lëshime që duhet t’i bëjë pala greke, palës turke, në territoret në Egje, duke cënuar pasurinë energjitike të nëndheshme, që aktualisht ndodhet brenda kufijve të Republikës së Greqisë.
Do i rezistojë dot presionit të Kancelares Merkel, kryeministri grek apo do të epet? Por nëse epet dhe bën lëshime, do i rezistojë dot revoltës së popullit, duke rrezikuar edhe humbjen e pushtetit?
Mesdheu dhe jo vetëm, por bota mbarë, duket të jetë një “kazan që vlon”.
Por që të ketë luftë duhet të kemi dy palë që janë të gatshme të luftojnë!
