Izraeli mund të përgjigjet me E-bombë.
Udhëheqja ushtarake e Iranit po strehohet në Isfahan.
“Garda Revolucionare” e Iranit publikoi një video të titulluar “Ndëshkimi është gati të ndodhë” ku tregohen raketat balistike mesa duket gati për t’u hedhur në drejtim të Izraelit.
Kjo nuk do të thotë se Irani do të hakmerret në këtë mënyrë: domethënë me lëshime masive.
Ka shumë mënyra për të goditur objektivat izraelitë brenda ose jashtë Izraelit.
Mesa duket Teherani po i mban kartat e tij të mbyllura dhe nuk do të njoftojë sesi do të hakmerret nëse e bën këtë.
Nga ana tjetër, mediat ndërkombëtare raportojnë se Izraeli dhe në varësi të madhësisë dhe shkallës së sulmit iranian, mund të përdorë bombën elektromagnetike, e cila do të çaktivizojë të gjitha qarqet elektronike dhe do të ndërpresë furnizimin me energji në Iran.
Nga ana e saj, SHBA është në gatishmëri të lartë për mundësinë e një hakmarrjeje të konsiderueshme nga Irani, sipas zyrtarëve amerikanë.
Alarmi vjen pasi komandanti i “Gardës Revolucionare” të Iranit u zotua për këtë
“Burrat tanë trima do të ndëshkojnë regjimin yionist” pasi një sulm ajror në një ndërtesë pranë ambasadës iraniane në Damask vrau shtatë anëtarë “të Gardës”, të hënën.
Teherani fajësoi Izraelin për sulmin, megjithëse ushtria izraelite nuk pranoi të komentojë për të konfirmuar ose mohuar përfshirjen, siç bën gjithmonë në raste të tilla.
Zyrtarët amerikanë thanë se tani shqetësohen se Irani mund të planifikojë të godasë objektiva brenda Izraelit në shenjë hakmarrjeje, duke shkaktuar një përshkallëzim të ri të armiqësive në Lindjen e Mesme.
Duke folur për NBC News në kushte anonimiteti, dy zyrtarë thanë se çdo hakmarrje brenda Izraelit ka të ngjarë të përqendrohet në objektiva ushtarakë ose sekretë dhe jo në civilë.
Një zyrtar tha se Uashingtoni mori një mesazh nga Irani pas sulmit dhe “ia bëri të qartë” Teheranit në përgjigje se “ne nuk ishim pas sulmit”.
“Ne gjithashtu paralajmëruam Iranin që të mos përdorte sulmin si pretekst për përshkallëzimin e mëtejshëm në rajon ose për të sulmuar objektet ose personelin amerikan”, shtuan ata.
Të dy zyrtarët i thanë gjithashtu NBC News se Irani mund të nisë një sulm duke përdorur një tufë dronësh ose raketash kundër objekteve diplomatike ose konsullore izraelite.
Një zyrtar tjetër i tha për CNN veçmas se “ne jemi sigurisht në një nivel të lartë gatishmërie” për kërcënimin e hakmarrjes.
Irani tha se sulmi i së hënës kishte në shënjestër një ndërtesë konsullore dhe për këtë arsye u konsiderua një sulm ndaj vetë Iranit. Ai tha se shtatë këshilltarë ushtarakë iranianë u vranë në sulm, duke përfshirë Mohammad Reza Zahedi, një komandant i lartë në Forcën Quds, që është grupi elitar paraushtarak iranian. Të enjten, Shtëpia e Bardhë tha se Presidenti i SHBA Joe Biden dhe kryeministri izraelit Benjamin Netanyahu diskutuan kërcënimin nga Irani në një telefonatë.
“Ekipet tona kanë qenë në kontakt të rregullt dhe të vazhdueshëm që atëherë. Shtetet e Bashkuara mbështesin plotësisht mbrojtjen e Izraelit kundër kërcënimeve nga Irani”, tha një zyrtar i lartë i administratës Biden.
