Ministria e Financave e Rusisë do të publikojë të dhënat e prillit në fillim të majit.
Të ardhurat e Rusisë nga nafta dhe gazi në prill pothuajse do të dyfishohen nga viti i kaluar, në 14 miliardë dollarë, falë çmimeve më të larta, treguan publikimet e Reuters, duke theksuar vështirësitë me të cilat janë përballur vendet perëndimore ndërsa kërkojnë të kufizojnë të ardhurat e Kremlinit dhe të dobësojnë fuqinë e tij ushtarake.
Lufta në Ukrainë ka shtyrë Perëndimin të vendosë sanksione të shumta që synojnë të frenojnë të ardhurat e naftës dhe gazit të Rusisë, të cilat përbëjnë rreth një të tretën e buxhetit federal të vendit.
Masat përfshinin gjithashtu kufizime për blerjet e naftës ruse, transaksionet financiare dhe transportin detar, si dhe një tavan çmimi prej 60 dollarë për fuçi.
Kërcimi i parashikuar i prillit në të ardhurat e Rusisë nga nafta është më i madh në terma përqindje, sesa rritja prej 30% e pritur për të gjithë vitin 2024.
Sipas llogaritjeve të Reuters, të ardhurat e parashikuara të Rusisë nga nafta dhe gazi në prill janë 1.292 trilion rubla (14 miliardë dollarë), nga 648 miliardë rubla në prill 2023 dhe pak më pak nga 1.308 trilion rubla muajin e kaluar.
Përllogaritjet e Reuters bazohen në të dhëna nga burimet e industrisë dhe statistikat zyrtare mbi prodhimin, rafinimin dhe furnizimet e naftës dhe gazit në tregjet vendase dhe ndërkombëtare.
Të ardhurat nga shitja e naftës dhe gazit janë jetike për ekonominë ruse të orientuar drejt eksportit të mallrave dhe për financimin e luftës në Ukrainë, të cilën ajo e quan një “operacion special ushtarak”.
Defiçiti buxhetor i Rusisë për tre muajt e parë të vitit u ngushtua në 607 miliardë rubla, ose 0.3% e prodhimit të brendshëm bruto (PBB), mbështetur nga një rikuperim i të ardhurave nga energjia.
Për të gjithë vitin 2024, qeveria ka buxhetuar të ardhura federale prej 11.5 trilion rubla nga shitja e naftës dhe gazit, 30% më shumë se viti 2023, duke kthyer një rënie prej 24% atë vit për shkak të çmimeve më të ulëta të naftës dhe eksporteve të gazit natyror, të cilat u prekën nga sanksionet.
