“Nuk është dhënë për të mirën e të tjerëve, por në shenjë bashkëpunimi!”
Presidenti i sapozgjedhur i SHBA-ve, Donald Trump, të shtunën (21/12) akuzoi Panamanë për vendosjen e çmimeve të tepruara për përdorimin e Kanalit të Panamasë dhe tha se nëse Panamaja nuk e menaxhon kanalin në mënyrë të pranueshme, ai do të kërkojë që aleati i saj ta dorëzojë atë.
Konkretisht, sipas Reuters, në një postim në Truth Social, Donald Trump paralajmëroi se nuk do ta linte kanalin të binte në “duart e gabuara” dhe dukej se paralajmëroi për ndikimin e mundshëm kinez në kalim, duke shkruar se kanali nuk duhet të menaxhohet nga Kina.
SHBA-të kryesisht, e ndërtuan kanalin dhe menaxhuan zonën përreth vendkalimit për dekada, por qeveria e SHBA-ve ia dorëzoi kontrollin e plotë të kanalit, Panamasë, në vitin 1999, pas një periudhe menaxhimi të përbashkët.
“Tarifat e ngarkuara nga Panamaja janë qesharake, veçanërisht duke ditur bujarinë e jashtëzakonshme që i është dhënë Panamasë nga SHBA-të”, shkruan Donald Trump në postimin e tij në Truth Social, duke theksuar: “Nuk është dhënë për të mirën e të tjerëve, por thjesht në shenjë bashkëpunimi mes nesh dhe Panamanë. Nëse parimet, morale dhe ligjore, të këtij gjesti bujar të dhënies nuk respektohen, atëherë ne do të kërkojmë që Kanali i Panamasë të na kthehet plotësisht dhe pa diskutim”.
Nga ana e saj, ambasada e Panamasë në Uashington nuk ka dashur të komentojë postimin e presidentit amerikan.
