Byroja Federale e Hetimit (FBI) ka konfirmuar se ka mbyllur zyrën e saj të diskutueshme të Diversitetit, Barazisë dhe Përfshirjes (DEI) të financuar nga taksapaguesit, vetëm disa ditë përpara se Donald Trump të marrë detyrën.
Njoftimi i papritur i FBI-së ka bërë që presidenti i zgjedhur të bëjë thirrje për transparencë në lidhje me aktivitetet dhe financimin e zyrës.
FBI nuk specifikoi arsyen e saktë për mbylljen, por masa përputhet me premtimin e fushatës së Trump për të reduktuar iniciativat e DEI nëpër agjencitë federale, sapo ai të betohet si presidenti i 47-të i SHBA-vw të hënën.
“Në javët e fundit, FBI ndërmori hapa për të mbyllur Zyrën e Diversitetit, Barazisë dhe Përfshirjes (DEI), në fuqi deri në dhjetor 2024”, tha agjencia në një deklaratë të cituar fillimisht nga Fox News të enjten.
“Kërkojmë që FBI të ruajë dhe të mbajë të gjitha të dhënat, dokumentet dhe informacionin mbi zyrën e DEI-së tani në mbyllje, nuk duhet të ishte hapur kurrë dhe do të duhej të ishte mbyllur shumë kohë më parë”, shkroi Trump në Truth Social të enjten mbrëma.
“Pse po mbyllen një ditë para inaugurimit të një administrate të re? Arsyeja është, KORRUPSIONI!” shtoi ai.
Vendimi i FBI-së vjen pas kritikave nga ligjvënësit republikanë të cilët argumentojnë se fokusi i agjencisë në DEI ka komprometuar sigurinë kombëtare dhe vjen në mes të një debati më të gjerë kombëtar mbi rolin e programeve të DEI-së në qeveri dhe në sektorin privat. Kritikët argumentojnë se iniciativa të tilla zvogëlojnë misionet kryesore dhe reduktojnë efektivitetin operacional.
Gjatë fushatës së tij, Trump premtoi të luftojë atë që mbështetësit e tij, përfshirë miliarderin e teknologjisë Elon Musk, e kanë quajtur “virusi woke”. Që nga fitorja e zgjedhjeve nga Trump, shumë korporata amerikane, duke përfshirë Meta, Amazon, McDonald’s, Ford dhe Walmart, kanë zvogëluar ose kanë braktisur masat e tyre DEI.
Në fillim të këtij muaji, senatori republikan Marsha Blackburn shprehu shqetësime në lidhje me përpjekjet DEI të FBI-së, në një letër drejtuar drejtorit në largim Christopher Wray. Blackburn pohoi se prioritetizimi i diversitetit mbi kompetencën mund të rrezikonte sigurinë publike.
“Thënë thjesht, fokusi juaj në iniciativat “woke” të DEI-së në FBI ka vënë në rrezik sigurinë tonë kombëtare dhe jetën e të gjithë amerikanëve”, shkroi Blackburn. “Amerikanët tani ndihen gjithnjë e më të pasigurt për shkak të incidenteve si sulmi terrorist i 1 janarit dhe prioritizimi i diversitetit nga FBI ndaj kompetencës, tregon se shqetësimet e tyre janë të bazuara mirë.”
Drejtori i FBI-së, Christopher Wray njoftoi në dhjetor se do të tërhiqej nga posti i tij. Wray, i nominuar fillimisht nga Trump në vitin 2017 pas shkarkimit të drejtorit të atëhershëm James Comey gjatë skandalit “Russiagate”, do të pasohet nga një i emëruar i ri. Administrata e ardhshme ka sinjalizuar planet për të emëruar Kash Patel, një ish zyrtar i sigurisë kombëtare të Shtëpisë së Bardhë, për të zëvendësuar Wray, në pritje të konfirmimit nga Senati.
