Çfarë tha presidenti i FIFA-s, Gianni Infantino?
Pas FIBA, FIFA, federata botërore njofton rikthimin e Rusisë në garat e saj! Njeriu i fortë i FIFA-s dhe miku i ngushtë i presidentit amerikan Trump, Gianni Infantino, deklaroi se “mezi pret të shohë sërish në veprim ekipet ruse, kombëtaren dhe klubet në organizimet ndërkombëtare të klubeve”.
Skuadrat ruse janë ndaluar nga të gjitha aktivitetet e futbollit nga FIFA dhe UEFA që nga shkurti i vitit 2022, me administratën e Biden që bëri thirrje për përjashtimin e tyre, në atë kohë.
Lufta në Ukrainë rezultoi në ndalimin e skuadrave ruse nga kudo, nga federatat botërore dhe europiane të futbollit, por FIFA është e gatshme t’i mirëpresë ata, siç tha presidenti i saj pas një pyetjeje të drejtuar atij.
“Nëse ka një rol të vogël që futbolli mund të luajë, kur ka paqe sigurisht, atëherë ne do të sigurohemi që ta bëjë. Mezi presim t’i shohim të gjitha vendet e botës të jenë në gjendje të luajnë futboll”, tha fillimisht Infantino dhe vazhdoi, “futbolli është një lojë për të gjithë, të gjithë e duan atë dhe është sporti nr.1. Ne u japim njerëzve mundësi për t’u lidhur dhe për të ardhur së bashku”.
