Kjo shumicë e shtuar i jep partisë së kryeministres mundësinë të anashkalojë Dhomën e Lartë, në të cilën partia nuk ka shumicën.
Partia në pushtet e Japonisë, e udhëhequr nga Kryeministrja Sanae Takaichi, fitoi lehtësisht në zgjedhjet e parakohshme të së dielës.
Pak para orës 16:00 (ora e Shqipërisë, mesnata e së dielës në Tokio), transmetuesi kombëtar raportoi se Partia Liberale Demokratike (LDP), së bashku me aleatin e saj partinë “Ishin”, sigurojnë më shumë se dy të tretat e vendeve në Dhomën e Ulët, domethënë, deri në 328 nga 465 vendet.
Kjo shumicë e shtuar i jep LDP-së mundësinë të anashkalojë Dhomën e Lartë, në të cilën partia nuk ka shumicën.
Kryeministrja e parë femër e vendit vendosi të kërkojë rizgjedhje vetëm katër muaj pasi mori detyrën si udhëheqëse e LDP-së. Ajo madje ishte zotuar të jepte dorëheqjen nëse partia e saj nuk arrinte të siguronte shumicën, duke i bërë zgjedhjet e parakohshme një rrezik të madh.
Popullariteti i vetë Takaichi-t ka qenë një ndihmë e madhe, pasi vlerësimet e miratimit të qeverisë së saj janë ende mbi 70%.
Presidenti i SHBA-ve Donald Trump, e ka mbështetur hapur atë. Disa ditë më parë, ai shkroi në një postim se kryeministrja “duhet të njihet për punën që ajo dhe koalicioni i saj po bëjnë”. Prandaj, shtoi ai në postimin e tij, “si president i Shteteve të Bashkuara të Amerikës, është nder për mua të shpreh mbështetjen time të plotë” për Sanae Takaichi-n.
Është një sukses që bie ndesh me dy paraardhësit e saj, nën të cilët partia humbi shumicën parlamentare për shkak të skandaleve të korrupsionit dhe rritjes së shpenzimeve.
Në vitin 2024, LDP humbi shumicën në të dy dhomat e parlamentit dhe aleanca e saj dhjetëvjeçare me partinë Komeito u shemb. Komeito madje bashkoi forcat me Partinë Kushtetuese Demokratike të Japonisë për të formuar bllokun më të madh të opozitës në parlament. Në këtë kontekst, Takaichi dhe LDP u përballën me një opozitë më të bashkuar se në të kaluarën.
Aleancat e udhëhequra nga LDP kanë qeverisur Japoninë për pjesën më të madhe të historisë së saj të pasluftës, shkruan BBC.
Zgjedhjet u mbajtën në mot të keq, me anulime të shërbimeve të trenave dhe trageteve. Është e rrallë që zgjedhjet të mbahen në dimër në Japoni – hera e fundit ishte 36 vjet më parë.
