“Mendoj se shumica e kubanezëve duan të jenë kapitalistë, jo komunistë”, tha ai në një intervistë që dha.
Sandro Castro nuk duket se ka ndonjë lidhje me imazhin dhe trashëgiminë politike të gjyshit të tij, i cili jeton dhe projekton një realitet krejtësisht të ndryshëm nga ai që përjetojnë shumica e qytetarëve në Kubë.
Në një vend ku qasja në internet mbetet e kufizuar, ai është aktiv si influencues, mban një klub nate dhe me më shumë se 150,000 ndjekës në Instagram, paraqet një stil jetese që sugjeron prosperitet, në një kohë kur jeta e përditshme, për shumë, është e vështirë. Në të njëjtën kohë, ai nuk ngurron të bëjë humor edhe për skenarët e pushtimit të Kubës nga Shtetet e Bashkuara.
Ndryshe nga anëtarët e tjerë të familjes së tij, të cilët mbajnë një profil të ulët dhe shmangin publicitetin, 33-vjeçari zgjedh të jetë në qendër të vëmendjes, duke kërkuar publicitet dhe shpesh duke sfiduar sistemin politik të vendit të tij.
Duke folur për CNN, ai u përpoq të shpjegonte qëndrimin e tij, duke argumentuar se imazhi i tij publik është keqinterpretuar. “Po bëj një video për një situatë të tensionuar dhe të trishtueshme”, tha Castro, duke iu referuar tensioneve në rritje midis ishullit dhe administratës Trump, të cilat kanë sjellë më tej kolaps ekonomik në Kubë. “Të paktën po përpiqem t’i bëj njerëzit të lumtur. T’i bëj të buzëqeshin. Nuk do të tallesha kurrë me një situatë nga e cila unë vetë po vuaj”, vëren ai.
Imazhi i prosperitetit në mes të krizës!
Përmes postimeve të tij në mediat sociale, Sandro Castro duket se shijon një jetë të rehatshme, e cila është dukshëm e ndryshme nga kushtet me të cilat përballen shumica e kubanezëve. Ai shpesh kritikon zyrtarët komunistë që pasuan Fidel Castron, i cili vdiq në vitin 2016 dhe Raul Castron, i cili dha dorëheqjen nga presidenca në vitin 2018.
Në një nga videot e tij të fundit, shfaqet një aktor i veshur si Donald Trump, i cili i sugjeron atij të blejë Kubën.
–“Mund të bëjmë biznes, sepse ti je një showman dhe një biznesmen si unë”, i thotë imituesi i Trump.
-“Çfarë do të blesh?” përgjigjet Castro.
–“Relaksohu!”
Zgjedhja e tij për të satirizuar skenarë të tillë ka shkaktuar reagime, pasi shoqëria kubaneze po përjeton vështirësi të mëdha dhe qytetarëve u është kërkuar të përgatiten edhe për një konflikt të mundshëm.
Megjithatë, ai pretendon se thjesht po shpreh zhgënjimin që ndiejnë shumë njerëz në vend.
“Është kaq e vështirë”, thotë ai, duke përshkruar jetën e përditshme në Kubë. “Përballesh me mijëra probleme. Një ditë mund të mos ketë energji elektrike, as ujë. Mallrat nuk mbërrijnë. Është shumë e vështirë, me të vërtetë e vështirë.”
Publiciteti dhe kritika!
Pavarësisht krizës energjetike që po prek ishullin, ai nuk duket se përballet me të njëjtat vështirësi, pasi vazhdon të promovojë një stil jetese të rehatshëm, alkool dhe pajisje moderne në apartamentin e tij në Havana.
Edhe pse pretendon se nuk është veçanërisht i pasur dhe se familja e tij nuk zotëron prona luksoze apo varka, imazhi që ai paraqet po shkakton reagime, veçanërisht kur merret parasysh se paga mesatare në Kubë është më pak se 20 dollarë në muaj.
Për shumë kubanë që jetojnë jashtë vendit, Sandro Castro është një simbol i kontradiktës: nipi i një udhëheqësi që mbrojti masat shtrënguese, duke u dukur se shijon elementë të një stili jetese kapitaliste.
Nga ana tjetër, për mbështetësit e regjimit, ai konsiderohet një person që shfrytëzon origjinën e tij për promovim personal.
“Ai shfrytëzon urrejtjen”, thotë Ted Henken, profesor i sociologjisë dhe antropologjisë në Kolegjin Baruch në New York. “Kardashianët, Paris Hilton dhe ai e shfrytëzojnë këtë zili duke thënë: ‘Shikoni stilin tim të mrekullueshëm të jetesës’”.
“Zemërimi fiton pëlqime dhe ndjekës”, vëren profesori.
Ai hedh poshtë akuzat se përfiton nga emri i tij, duke theksuar se gjithçka që ka fituar është rezultat i përpjekjeve personale. “Atë pak që kam, ia detyrohem përpjekjeve të mia, sakrificës sime”, thotë Castro. “Emri im është emri im. Jam krenar për emrin tim. Por nuk e shoh këtë ndihmë për të cilën po flisni. Unë jam një qytetar i zakonshëm”, vëren ai.
Qëndrimi i tij ndaj sistemit!
Sandro Castro deklaron se nuk ka ndërmend të kufizojë praninë e tij në mediat sociale, pavarësisht presionit që ka marrë edhe nga familja e tij për të fshirë disa postime.
Ai pranon se është thirrur nga autoritetet për shpjegime, megjithatë, siç thotë ai, është liruar, pasi nuk ka nxitur dhunë apo përmbysje të regjimit.
Duke folur për të ardhmen, ai shpreh ambicie për të zgjeruar aktivitetet e tij të biznesit, ndërsa kritikon burokracinë që, siç pretendon ai, kufizon aktivitetin ekonomik në Kubë.
“Ne duhet të reformojmë modelin ekonomik, të eliminojmë burokracinë. Unë jam revolucionar, por një revolucionar i ideve, i progresit, i ndryshimit”, tha ai.
Në të njëjtën kohë, ai nuk ngurron të shprehë një mendim negativ për udhëheqjen aktuale të vendit. “Nuk do të thoja se po bëjnë një punë të mirë. Sipas mendimit tim, nuk po bëjnë punë të mirë”, tha ai.
E ardhmja e Kubës
Nipi i Fidel Castros beson se shoqëria kubaneze është në një fazë ndryshimi, me një pjesë të konsiderueshme të popullsisë që e sheh pozitivisht një model të ndryshëm ekonomik.
“Ka shumë njerëz në Kubë që mendojnë në një mënyrë kapitaliste. Ka shumë njerëz këtu që duan të zbatojnë kapitalizmin me sovranitet”, tha ai.
“Mendoj se shumica e kubanezëve duan të jenë kapitalistë, jo komunistë”, përfundoi ai.
