Mister rrethon vdekjen e oficerit amerikan në pension, para se të dëshmonte në komitetin e Senatit për pamjet sekrete të UFO-ve.
Gjithashtu të mbuluara me mister janë 11 vdekje dhe zhdukje të tjera të regjistruara që nga viti 2022 për të njëjtën temë, siç shkruam dhe në artikullin e mëparshëm.
Një ish oficer i inteligjencës së Forcave Ajrore Amerikane vdiq në rrethana misterioze para se të dëshmonte në një seancë dëgjimore mbi UFO-t, duke shkaktuar thirrje për një hetim nga ana e FBI-së.
Matthew James Sullivan ishte vetëm 39 vjeç kur vdiq, më 12 maj 2024, me shkak vdekjeje, vetëvrasjen. Megjithatë, shkaku zyrtar i vdekjes nuk është bërë ende publik dhe as vdekja nuk është raportuar nga mediat lokale në atë kohë.
Tani, senatori Eric Burlison nga Missouri i tha gazetës britanike Daily Mail se Sullivan po përgatitej të ishte dëshmitar kyç për hetuesit e Kongresit që hetojnë UFO-t në vend.
Burlison tha se kishte “shqetësime serioze” që vdekja e Sullivan ishte “e dyshimtë”, duke sugjeruar se oficeri veteran i inteligjencës mund të ketë qenë në shënjestër për ta heshtur, para se të zbulonte njohuritë rreth anijeve kozmike jo njerëzore dhe alienëve. “Shikoni kredencialet dhe përvojën e Matthew Sullivan. Ai ishte sigurisht dikush që kishte qasje në nivelet më të larta të klasifikimit dhe dinte disa nga sekretet më të rëndësishme të kombit tonë”, shpjegoi Burlison.
“Edhe shumë nga ata të tjerët janë zhdukur”, theksoi ai.
Senatori shpjegoi se një hetim nga Inspektori i Përgjithshëm i Komunitetit të Inteligjencës së SHBA-ve zbuloi “akuza serioze për sjellje të pahijshme dhe aktivitete potencialisht të paligjshme” që sugjerojnë se vdekja e 39-vjeçarit nuk ishte vetëvrasje.
Burlison tha: “Fakti që ai ishte caktuar nga Task Forca e UAP, fakti që ai ishte caktuar të fliste…, pasi dëgjova për këtë tragjedi, mendova se ia vlente ta shqyrtoja”.
Të enjten, ai i paraqiti një kërkesë zyrtare Drejtorit të FBI-së, Kash Patel, që agjentët të hetonin vdekjen e Sullivan si një krim të mundshëm.
“Rrethanat e papritura dhe të dyshimta rreth vdekjes së tij ngrenë shqetësime të konsiderueshme në lidhje me aktivitetin e mundshëm kriminal dhe sigurinë e të tjerëve të përfshirë në këtë çështje”, shkroi Burlison në një letër drejtuar FBI-së.
Sullivan kishte qenë në kontakt me informatorin e UAP dhe majorin në pension të Forcave Ajrore Amerikane, David Grose, përpara vdekjes së papritur të oficerit të inteligjencës, e cila thuhet se e la Grose-in “jashtëzakonisht të shkatërruar”.
Grose, këshilltar i lartë i Burlison, kaloi 14 vite në Forcat Ajrore Amerikane, përpara se të punonte si oficer inteligjence për Kompaninë e Ordnancës së Zbulimit të SHBA-ve, e cila ndërton dhe lëshon satelitë mbikëqyrjeje për Pentagonin. Ai përfundimisht u bë një sinjalizues, duke dëshmuar para Kongresit në vitin 2023 pasi dyshohet se mësoi që elementë të qeverisë amerikane kishin mbuluar programet e rikuperimit të UFO-ve dhe inxhinierisë, për dekada të tëra.
“Grouse po e ndihmonte të shfaqej si informator”, konfirmoi Burlison.
Senatori shtoi se nuk kishte folur drejtpërdrejt me Sullivanin dhe nuk dinte se çfarë informacioni ishte i gatshëm të zbulonte rreth kohës së tij në Forcat Ajrore të SHBA-ve dhe si kontraktor për Departamentin e Luftës, duke punuar në disa nga bazat më sekrete të vendit.
Në mënyrë specifike, Sullivan kishte një sfond të gjerë të lidhur me inteligjencën ushtarake dhe teknologjinë e përparuar të përdorur nga SHBA-të në të gjithë botën.
Ai gjithashtu punoi me disa grupe që dyshohet se kanë lidhje dekadash me sekretet e UFO-ve në Amerikë.
Pasi shërbeu si “shef i inteligjencës së avionëve të gjeneratës së 5-të”, Sullivan punoi në Qendrën Kombëtare për Inteligjencën Ajrore dhe Hapësinore si zëvendësdrejtor në Bazën Ajrore Wright-Patterson.
Kompleksi i Ohajos ka qenë prej kohësh i lidhur me rikuperimin e supozuar të anijeve kozmike aliene të rrëzuara nga incidenti i Roswellit të vitit 1947.
Sullivan gjithashtu punoi për Agjencinë e Projekteve të Kërkimit të Avancuar të Mbrojtjes (DARPA), e cila është përshkruar si “think tank” i Pentagonit, për shkak të rolit të saj të dokumentuar në krijimin e teknologjisë futuriste si interneti, GPS dhe teknologjia e fshehtësisë.
Burlison argumentoi se FBI duhet të hetojë vdekjen e dyshimtë të Sullivanit, mes një numri në rritje të shkencëtarëve të zhdukur dhe të vdekur në të gjithë SHBA-të vitet e fundit, duke thënë se njohuritë e veteranit për të dhënat e klasifikuara përputheshin me modelin e supozuar.
Senatori shtoi se ai kishte qenë tashmë në kontakt me anëtarët e FBI-së, të cilët as nuk do të konfirmonin dhe as nuk do të mohonin nëse komuniteti i inteligjencës amerikane po hetonte vdekjen e Sullivanit, apo 11 vdekjet dhe zhdukjet e tjera që janë regjistruar që nga viti 2022.
Disa shkencëtarë dhe zyrtarë të administratës me lidhje me NASA-n, kërkimin bërthamor, programet hapësinore dhe projektet e klasifikuara janë zhdukur ose janë deklaruar të vdekur vitet e fundit.
Shumë nga individët, përfshirë personelin nga Laboratori i Propulsionit Reaktiv të NASA-s dhe Laboratori Kombëtar i Los Alamos, kishin qasje në informacione të ndjeshme në lidhje me misionet hapësinore, teknologjinë bërthamore apo sistemet e përparuara të mbrojtjes, duke nxitur spekulime rreth lidhjeve të mundshme.
Burlison dhe Kryetari i Komitetit Mbikëqyrës të Dhomës së Përfaqësuesve, James Comer, po përgatisin një letër të përbashkët për FBI-në duke listuar disa nga rastet, që senatorët duan të hetohen si pjesë e një komploti të mundshëm.
Deri më tani, rasti i Sullivan thuhet se është gjykuar vetëm nga një “ekzaminues mjekësor lokal i Virxhinias”.
Burlison vuri në dukje se kishte folur me dëshmitarë të mundshëm që kishin frikë se do të ishin viktima të aktivitetit kriminal përpara se t’u jepej mundësia të dëshmonin për punën e tyre në programet që lidhen me UFO-t.
“Ka disa persona që kanë dalë hapur për të deklaruar publikisht ato që dinë, thjesht për të shmangur çdo lloj aktiviteti kriminal. Në shumë mënyra, dalja publike mund të jetë një mbrojtje në vetvete. Unë njoh të paktën një person që doli dhe foli publikisht dhe e bëri këtë sepse ndjeu se jeta e tij ishte vënë në rrezik”, përfundoi ai.
A do ta mësojë ndonjëherë populli amerikan të vërtetën për të gjitha këto programe sekrete?
Po zhdukja dhe vdekja e 11 personave që angazhoheshin pothuajse në të njëjtin sektor, a do të mund të zbulohet ndonjëherë?
