“Re të errëta” për sigurinë globale: Gjermania nxori një manual për ndërtimin e menjëhershëm të strehimoreve atomike.
Strehimet grupore pas përvojës së Ukrainës dhe vdekjeve masive nga Kinzhal dhe Iskander u konsideruan të papërshtatshme.
Siguria globale duket se mbulohet nga “re të errëta”, pasi vendet e mëdha si Gjermania fillojnë dhe lëshojnë direktiva për vendin në rast lufte, pas asaj që po ndodh në Ukrainë, duke u përpjekur të tretin doktrinat e reja të përdorura dhe metodat sesi do të mbrohen.
Populli i Gjermanisë ka gjithnjë e më shumë frikë nga mundësia e përhapjes së luftës në Europë pas ndërhyrjes ruse në Ukrainë dhe sipas Süddeutsche Zeitung, kabineti do të miratojë brenda ditës masat për organizimin e vendit në kohë lufte, veçanërisht pas asaj që ata kanë parë se çfarë mund të bëjnë armët e reja balistike ruse, si Kinzhal dhe ISKANDER.
Rezultatet shkatërruese të raketave të mësipërme ruse kundër objektivave ukrainase, kanë krijuar shqetësim të madh për stafin gjerman të cilët shohin se sistemet e mbrojtjes ajrore janë praktikisht të pamundura për të kapur objektiva të këtij niveli.
Dokumenti gjerman me 81 faqe është një udhëzim për situata emergjente. Në këtë rast, kompetencat e kancelarit do të shtohen, duke i kaluar atij kompetencat e kontrollit dhe të mbrojtjes. Ministri i Mbrojtjes do të jetë vetëm kreu i administratës së Bundeswehr-it.
Siç zbulon Spiegel, një raport i ekspertëve të Ministrisë së Brendshme, Agjencisë së Mbrojtjes Civile dhe Ndihmës në Fatkeqësi dhe Agjencisë së Pasurive të Paluajtshme do të diskutohet në takimin e ministrave të brendshëm të shtetit, në Potsdam në mes të muajit.
Ai analizon mënyrën më të mirë për të mbrojtur qytetarët në rast lufte, në dritën e një koncepti të ri të mbrojtjes civile.
Ndryshe nga Lufta e Dytë Botërore, nuk priten bombardime që do të shkatërronin qytete të tëra. Kjo është arsyeja pse popullsia e Gjermanisë nuk duhet të gjejë mbrojtje në strehime të mëdha publike.
Kjo për shkak se ato “nuk ofrojnë siguri kundër armëve moderne të precizionit, të cilat shkatërrojnë objektiva të zgjedhura mirë me rëndësi vetëm për luftën dhe në rast sulmi kanë një kohë paralajmërimi prej vetëm disa minutash”.
Por çfarë rekomandojnë saktësisht ekspertët? “Dhomat nën nivelin e tokës ose brenda ndërtesave tashmë mund të mbrojnë kundër disa prej rreziqeve të mundshme.”
Një alternativë tjetër do të ishin të ashtuquajturat “strehime në shtëpi”, pra bodrume, dhoma ose hapësira nën nivelin e tokës ose brenda ndërtesave.
Në fakt, për të përmirësuar shkallën e mbrojtjes, propozohen mënyra si mbrojtja e mureve apo mbulimi i përkohshëm i dritareve dhe hapjeve të bodrumit… nga persona pa formim teknik dhe në baza vullnetare.
Ekspertët rekomandojnë gjithashtu Shelter Sharing, ndarjen e këtyre strehimeve, edhe pse “shumica e popullsisë mund të krijojë strehimore në hapësirat e veta”.
Qëllimi përfundimtar është “krijimi i numrit më të madh të mundshëm të hapësirave vetëmbrojtëse, të cilat natyrisht ofrojnë dukshëm më pak mbrojtje në rast të sulmeve bërthamore, biologjike dhe kimike”.
Për më tepër, opsionet e mbrojtjes duhet të ofrohen në qendrat urbane për ata që mund të gjenden “të befasuar nga një sulm ushtarak ndërsa janë në lëvizje”.
Për këtë rast, të përshtatshme si ndërtesa do të ishin dhomat në ndërtesat publike, magazinat, garazhet nëntokësore, stacionet nëntokësore, tunelet.
Udhëzimet totale të mbrojtjes.
Ekspertët kërkojnë prej vitesh rishikimin e koncepteve ekzistuese të mbrojtjes së popullatës civile dhe grupi i ekspertëve jep udhëzime apo alternativa konkrete për këtë, tani më me dokumentin zyrtar shtetëror.
Që gjendja e strehimeve ekzistuese nuk është e mirë është një sekret publik. Nga 2.000 strehime publike që ekzistonin dikur, vetëm 579 janë ende në funksion sot.
Vetëm 470.000 njerëz mund të gjenin strehë në to. Megjithatë, këto strehime mund të mos jenë vendi më i mirë për të mbrojtur veten.
Në raport thuhet në mënyrë eksplicite se saktësia dhe efektiviteti i sistemeve të armëve të sotme është “aq i madh sa një goditje e drejtpërdrejtë mund të shkatërrojë çdo lloj strehimi”.
Me fjalë të tjera, nuk ka mbrojtje të plotë kundër sulmeve të armikut. Por kjo nuk ul përgjegjësinë e shtetit për të hartuar masa të reja mbrojtëse dhe, duke pasur parasysh gjendjen e keqe të strehimeve klasike, komiteti propozon diçka të pazakontë: shndërrimin e bodrumeve private në strehime.
Ekspertët vlerësojnë se rreth 210.100 strehime më të mëdha do të duhet të ndërtohen për të mbrojtur rreth 85 milionë njerëz që jetojnë në Gjermani. Kostoja totale vlerësohet në 140.2 miliardë euro.
Një seksion tjetër trajton një sërë rregulloresh më specifike, të krijuara për të mbajtur vendin të funksionojë në raste urgjente.
Këtu përfshihet ruajtja e energjisë ose ushqimit, si dhe detyrimi i mediave për të transmetuar menjëherë njoftimet e qeverisë dhe për të paralajmëruar. “Për herë të parë në dekada, Gjermania është nën kërcënimin ushtarak”, përmendur tashmë në paragrafin e parë të dokumentit.
Në një sondazh prillin e kaluar në emër të ARD Deutschland trend, 67% e të anketuarve janë përgjigjur se e konsiderojnë kërcënimin ndaj sigurisë dhe paqes në Europë si të fortë ose shumë të fortë. Kjo është një rritje prej 28% krahasuar me shkurtin 2019.
Sidomos të rinjtë e ndiejnë këtë frikë më shumë sesa frikën e ndryshimeve klimatike. Dhe kjo del nga një studim i fundit me emërtimin “Rinia në Gjermani”, i cili regjistron tendencat e popullsisë së re në moshë në Gjermani.
Pothuajse 70% e të anketuarve të moshës 14 deri në 29 vjeç kanë frikë nga lufta në Europë. Për herë të parë lufta bëhet vërtetë e prekshme për brezin e ri. Kjo edhe për faktin se Ukraina është gjeografikisht afër. Nga Leipzig, për shembull, Kievi është vetëm pak më larg se Roma, më pak se 1.500 kilometra.
