Këto stërvitje janë një përgjigje ndaj deklaratave të presidentit të Tajvanit për sovranitetin e ishullit.
Me rastin e stërvitjes Joint Sword 2024-B, Kina rrethoi Tajvanin me Forcat e saj Detare dhe Ajrore, duke i dërguar një mesazh të fortë SHBA-ve!
Konkretisht, sipas ministrisë së mbrojtjes së ishullit, 125 avionë kinezë, 17 luftanije dhe aeroplanmbajtësja kineze Liaoning, morën pjesë në stërvitjet ushtarake rreth Tajvanit.
Stërvitjet janë një përgjigje ndaj vërejtjeve të presidentit të Tajvanit mbi sovranitetin e ishullit në Ditën Kombëtare, javën e kaluar.
Tajvani tha se 90 avionë hynë në zonën e identifikimit të mbrojtjes ajrore të vendit, duke përfshirë avionë, helikopterë dhe dronë. Në total, u regjistruan 125 avionë, një rekord i ri për një ditë të vetme.
Tajvani vendosi anije luftarake për të monitoruar lëvizjet e anijeve kineze, ndërsa radari i saj gjurmonte lëvizjet e tyre nga toka.
Kina shpesh kryen stërvitje ushtarake në ngushticën e Tajvanit, duke dashur të demonstrojë gatishmërinë dhe fuqinë e saj ushtarake.
Këto ushtrime u përshkallëzuan pas vizitës së ish kryetares së Dhomës së Përfaqësuesve të SHBA, Nancy Pelosi në Tajvan, në vitin 2022, ku madje u simulua dhe një bllokadë detare.
Ministria e Mbrojtjes e Kinës konfirmoi se stërvitjet ishin një sukses, me zëdhënësin Li Xi të deklarojë se ato ishin “një paralajmërim i madh për ata që mbështesin pavarësinë e Tajvanit”.
Stërvitjet përfshinin simulime të lëshimeve të raketave, krijimin “e pistave ajrore të sulmit” nga avionët dhe misionet e bombarduesve me rreze të gjatë.
SHBA, aleati më i madh i Tajvanit, lëshoi një deklaratë duke i bërë thirrje Kinës të tregojë përmbajtje dhe të shmangë veprimet që mund të dëmtojnë paqen dhe stabilitetin në rajon.
Stërvitjet ushtarake tregojnë vendosmërinë e Kinës për të mbajtur kontrollin mbi rajon, ndërsa Tajvani dhe aleatët e tij vazhdojnë t’i rezistojnë presionit. Përshkallëzimi i vazhdueshëm mund të çojë në tensione të reja në rajonin e gjerë të Paqësorit.
