Askush nuk e di se çfarë janë këto objekte.
Shikimet e dronëve misteriozë që fluturojnë mbi New York po përhapen në SHBA, ndërsa në paraqitjen më të fundit ata janë parë mbi Staten Island. Banorët raportuan se kishin parë dronët që mbanin një dritë të ndritshme në qiellin e natës mbi ishull të enjten, raporton Staten Island Advance.
Banorët i përshkruajnë dronët se kishin një “dritë të bardhë në qendër dhe një dritë të kuqe në secilën anë”.
Përllogaritet se objektet të jenë afro 5 metra të gjata.
Të gjitha pamjet ndodhën jo shumë larg urës Goethals, pranë kufirit të ishullit me New Jersey, ku dronët me origjinë të panjohur janë parë vazhdimisht që nga 18 nëntori.
Tani, politikanët e Staten Island po kërkojnë përgjigje dhe kufizime fluturimi mbi bashki.
Zëdhënësja Nicole Malliotaki lëshoi një deklaratë duke u bërë thirrje autoriteteve federale të përcaktojnë origjinën e dronëve.
“Pas raporteve të objekteve fluturuese të paidentifikuara që duket se janë dronë që fluturojnë mbi Staten Island, i kam kërkuar Administratës Federale të Aviacionit të vendosë kufizime të përkohshme të fluturimit me dron në zonë, në pritje të njoftimit të menjëhershëm nga Departamenti i Sigurisë Kombëtare dhe Byroja Federale e Hetimit”, shkruan deputeti i rajonit në një deklaratë.
Presidenti i Këshillit Bashkiak të Staten Island, Vito Fossella po u bën thirrje gjithashtu autoriteteve federale të identifikojnë këto objekte fluturuese.
“Kohët e fundit jemi vënë në dijeni për dronët e mëdhenj të stilit ushtarak që fluturojnë mbi pjesë të New Jersey në javët e fundit. Gjithashtu ka ardhur në vëmendjen tonë nga banorët e shqetësuar dhe mediat që këta dronë tani kanë fluturuar mbi Staten Island gjatë ditëve të fundit”, shkruan Fossella në letër, sipas Staten Island Advance.
“Është e çuditshme dhe shumë e habitshme që askush nuk mund të kuptojë se kush i drejton këta drone, nga vijnë dhe cili është qëllimi i tyre.
Është raportuar se disa nga dronët mund të fluturojnë pa një transponder aktiv, duke rritur shqetësimin për vendndodhjen e tyre”, shtoi kreu i bashkisë Staten Island.
