Përmbysja e regjimit të Assad-it në Siri, disfata e Hezbollah-ut në Liban dhe armëpushimi me Izraelin, mund ta kenë vënë Iranin në një pozitë të keqe, por Donald Trump nuk përjashton mundësinë e një lufte.
Në veçanti, presidenti i ardhshëm i SHBA-ve, Donald Trump tha dje (12.12.2024) se “çdo gjë mund të ndodhë”, kur u pyet për mundësinë e një lufte midis SHBA-ve dhe Iranit gjatë mandatit të tij të ardhshëm presidencial.
“Çdo gjë mund të ndodhë. Është një situatë shumë fluide”, tha presidenti i sapozgjedhur amerikan dhe më pas shtoi se gjëja më e rrezikshme për momentin është që Ukraina të lëshojë raketa ndaj Rusisë, që do të ishte një përshkallëzim i madh, siç tha ai.
Trump e ka kërcënuar më parë Iranin, me qeverinë amerikane që pretendon se Garda Revolucionare tentoi ta vriste atë. Por Irani e ka mohuar këtë pretendim.
Gjatë mandatit të tij të parë në detyrë në vitin 2020, Trump urdhëroi një sulm ajror të SHBA-ve që vrau komandantin më të lartë ushtarak të Iranit dhe kreun e forcave speciale të Gardës Revolucionare al-Quds, Qassem Soleimani.
Gjithashtu në vitin 2018, republikani tërhoqi SHBA-të nga marrëveshja bërthamore që paraardhësi i tij Barack Obama kishte përfunduar në vitin 2015 dhe rivendosi sanksionet ekonomike të SHBA-ve kundër Teheranit.
