Jahti Nord, 142 metra i gjatë me vlerë 500 milionë dollarë, kaloi nëpër Ngushticën e Hormuzit.
Jahti luksoz Nord, i cili është i lidhur me miliarderin rus të sanksionuar Aleksei Mordashov, kaloi nëpër Ngushticën e Hormuzit të shtunën, sipas të dhënave të trafikut të anijeve, duke e bërë atë një nga anijet e pakta që kaloi zonën e embargos në zemër të konfliktit SHBA-Iran.
Mister mbi jahtin luksoz të manjatit rus që kaloi nëpër Ngushticën e Hormuzit – Kush është Mordashov?
Jahti Nord, 142 metra i gjatë u nis nga një marinë e Dubait rreth orës 14:00 GMT të premten, kaloi nëpër Ngushticë të shtunën në mëngjes dhe mbërriti në Muscat herët të dielën në mëngjes, sipas të dhënave nga platforma MarineTraffic.
Nuk është e qartë sesi jahtit me shumë kuverta iu dha leja për të bërë udhëtimin. Irani ka kufizuar vazhdimisht kalimin nëpër Ngushticë, nëpër të cilën kalojnë një e pesta e furnizimeve botërore me naftë, që nga shkurti.
Një zëdhënës i manjatit të çelikut Mordashov nuk pranoi të komentojë për këtë çështje.
Vetëm një grusht anijesh, kryesisht tregtare, kalojnë nëpër rrugën ujore kritike në hyrje të Gjirit çdo ditë, ndërsa Uashingtoni dhe Teherani negociojnë një armëpushim të brishtë. Kjo është një pjesë e vogël e mesatares prej 125 deri në 140 kalimesh ditore para se të fillonte lufta e Iranit më 28 shkurt.
SHBA-të kanë vendosur një bllokadë të porteve iraniane në kundërpërgjigje.
Rusia dhe Irani janë aleatë të hershëm dhe janë afruar më shumë vitet e fundit, përmes një traktati të vitit 2025 që nxit ndarjen e inteligjencës dhe bashkëpunimin e sigurisë.
Ministri i Jashtëm iranian Abbas Araghchi mbërriti në Rusi për t’u takuar me presidentin rus, pas bisedimeve me ndërmjetës në Pakistan dhe Oman gjatë fundjavës.
Kush është Mordashov?
Mordashov, i njohur si një bashkëpunëtor i ngushtë i Putin, nuk është zyrtarisht i listuar si pronar i jahtit Nord. Megjithatë, të dhënat e transportit detar dhe të dhënat e korporatave ruse nga viti 2025 tregojnë se anija ishte regjistruar në emër të një kompanie ruse në pronësi të gruas së tij në vitin 2022. Kjo kompani është e regjistruar në qytetin rus Cherepovets, ku është regjistruar edhe fabrika e çelikut Severstal e Mordashov.
Mordashov është ndër rusët që janë sanksionuar nga SHBA-të dhe Bashkimi Europian që nga pushtimi i Ukrainës nga Rusia, për shkak të lidhjeve të tyre me presidentin Putin.
Superjahti Nord, një nga jahtet më të mëdhenj në botë, ka 20 kabina, një pishinë, një pistë helikopterësh dhe një nëndetëse, sipas faqes së internetit Superyacht Times.
