Ndihma ushtarake për Ukrainën do të vazhdojë.
Presidenti i sapozgjedhur i SHBA-së, Donald Trump, vetëm disa ditë para se të betohet si presidenti i 47-të i SHBA-ve, tha se do t’u kërkonte vendeve anëtare të NATO-s të rrisin shpenzimet e mbrojtjes në 5% të PBB-së, ndërsa tha gjithashtu se ka në plan të vazhdojë ofrimin e ndihmës ushtarake për Ukrainën edhe pse më herët ka deklaruar se kjo ndihmë do të shkurtohet.
Ekipi i Donald Trump u ka thënë zyrtarëve europianë se presidenti i ri amerikan do t’u kërkojë vendeve anëtare të NATO-s që të rrisin shpenzimet e tyre të mbrojtjes në 5% të PBB-së, por planifikon të vazhdojë ofrimin e ndihmës ushtarake për Ukrainën.
Këshilltarët më të afërt të presidentit të zgjedhur të SHBA-ve për politikën e jashtme, ndanë synimet e tij në diskutimet me zyrtarë të lartë europianë këtë muaj, sipas njerëzve të njohur me bisedimet, pasi ai forcon politikat e tij ndaj Europës dhe ndërhyrjes së Rusisë në Ukrainë, thonë ata FT.
Gjatë fushatës së tij për Shtëpinë e Bardhë, Trump premtoi të ndërpresë ndihmën për Ukrainën, të detyrojë Kievin të kalojë në bisedime të menjëhershme për paqen, nëse nuk shpenzon mjaftueshëm për mbrojtjen, duke tmerruar kryeqytetet europiane.
Por në një nxitje për aleatët, i shqetësuar për aftësinë e tyre për të mbështetur dhe mbrojtur Ukrainën pa mbështetjen e Uashingtonit, Trump tani planifikon të mbajë ndihmën ushtarake të SHBA-ve për Kievin pasi të betohet, sipas tre personave të tjerë që u informuan mbi diskutimet me zyrtarët perëndimorë.
Në të njëjtën kohë, Trump do të kërkojë që NATO të dyfishojë objektivin e saj të shpenzimeve prej 2%, i përmbushur aktualisht nga vetëm 23 nga 32 anëtarët e aleancës, në 5%, thanë dy persona të informuar mbi bisedimet.
Një person tha se e kuptonte se Trump do të kënaqej me 3.5% dhe se ai planifikoi të lidhë në mënyrë eksplicite shpenzime më të larta të mbrojtjes dhe të ofrojë kushte më të favorshme tregtare me SHBA-të.
“Është e qartë që po flasim për 3% ose më shumë për samitin e NATO-s në qershor në Hagë”, tha një zyrtar europian.
Aleatët e NATO-s janë tashmë në bisedime për të rritur objektivin në 3% në takimin e liderëve në qershor, por shumë kryeqytete janë të shqetësuara për vendimet e vështira fiskale që do të kërkoheshin për ta bërë këtë.
Sipas Zyrës së Menaxhimit dhe Buxhetit të Shtëpisë së Bardhë, SHBA-të do të shpenzojnë rreth 3.1% të PBB-së për mbrojtjen. Në vitin e fundit të presidencës së parë të Trump në 2020, shpenzimet e Pentagonit arritën në 3.4%.
Tërheqja e SHBA-ve nga NATO?
Duhet theksuar se Donald Trump së fundmi, në një intervistë ka deklaruar se SHBA-të do të qëndrojnë në NATO vetëm nëse shtetet e tjera anëtare të Aleancës paguajnë faturat e tyre.
Donald Trump kishte theksuar se do të konsideronte “absolutisht” tërheqjen e SHBA-ve nga aleanca ushtarake e NATO-s, nëse SHBA-të nuk trajtohen me drejtësi, siç tha ai, duke iu referuar shpenzimeve të mbrojtjes.
Sa më sipër, mund të jetë edhe një justifikim i mirë për shkëputjen e SHBA-ve nga NATO, pasi presidenti i zgjedhur e di shumë mirë që kërkesa e tij për 5% nuk do të pranohet nga vendet europiane për arsye objektive.
WATCH: Trump says he’ll stay with NATO, but only if they’re paying their bills and are willing to restructure unfair trade agreements with the U.S.
— TV News Now (@TVNewsNow) December 8, 2024
pic.twitter.com/1c1j64Jzd7
