Manifesti i Erdoganit që foli për “Shekullin e Turqisë”.
Duke folur në një aktivitet të partisë së tij (AKP), të emërtuar “Shekulli i Turqisë”, presidenti turk Tajip Erdogan prezantoi planin e tij shumë ambicioz dhe është një plan që duhet të shqetësojë vendet përreth.
Ndër sukseset që ai renditi ishte shndërrimi i Kishës së Agia Sofisë në xhami.
Ai falenderoi Devlet Bakhcelin, kreun e “Ujqërve Gri” dhe partnerin e tij në qeveri, ndërsa pohoi se do ta bënte Turqinë një nga 10 vendet më të mëdha në botë në të gjithë sektorët. “Në momentin kur bota po përballet me sfida të reja dhe jetike, ne duam të bëjmë një fillim të fuqishëm në shekullin e ri të Republikës sonë me programin Shekulli i Turqisë”, tha ndër të tjera Erdogan në një event që u kombinua edhe me 99-vjetorin e krijimit të Republikës Turke.
“Shpresojmë, me krenarinë e 99-vjetorit të Republikës sonë, të gdhendim “Shekullin e Turqisë” në kujtesën tonë kombëtare. Ne hymë në shekullin e 19të pas një sulmi që donte t’i jepte fund 900 viteve të ekzistencës sonë në trojet e Anadollit, nga ata që donin të varrosnin kombin tonë, historinë tonë së bashku me to dhe shtetin osman, këtë herë nuk u përballën drejtpërdrejt si në Çanakala apo Kut’ul Amare, por tentuan të pushtonin Anadollin duke përdorur automjetin”, tha ndër të tjera Erdogan në fjalën e tij.
“Fakti që e rihapëm Agia Sofinë, e cila ishte ëndërr e brezave, si xhami, sipas mandatit të Fatihut, është një sfidë e madhe kundër kujdestarisë globale. Është një e vërtetë në këtë periudhë historike. Dua të shpreh mirënjohjen time për çdo qytetar që qëndron pranë nesh”, shtoi ai.
Ai iu referua disa herë forcave të jashtme që po komplotojnë kundër Turqisë dhe që po tentojnë ta thyejnë atë me “mjete” të ndryshme. Siç theksoi ai, në 20 vitet e qeverisjes së tij, jo gjithçka ishte rozë, kishte edhe vështirësi, megjithatë për momentin, ai është gati për një “Shekull të ri të Turqisë”, në të cilin vendi i tij do të bëhet një nga 10 fuqitë më të mëdha në planet.
Duke iu referuar industrisë së mbrojtjes, ai tha se përveç plotësimit të nevojave tona, ne jemi bërë një vend që mund të eksportojë produkte të industrisë së mbrojtjes në 170 vende, veçanërisht UAV, SİHA, mjete tokësore dhe platforma detare.
Por, të dashur lexues, mos harroni që po ky njeri që thotë dhe premton të tilla situata për Turqinë, natën e grushtit të shtetit, hipi në një helikopter dhe u zhduk, për të shpëtuar kokën. Të tillë personazhe politikë, për të mbajtur fronin e tyre, mund ta flijojnë popullin e tyre. Që ky person të ndërmarrë çdo lloj marrëzie nuk është më e pabesueshme, por shkatërrimi më pas është i sigurtë dhe shpërbërja e shtetit turk një proçes pa kthim.
