Gepard mbetet pa plumba, pasi Zvicra i ka ndaluar Gjermanisë dërgimin e municioneve zvicerane në Kiev.
12.400 fishekë municioni 35mm që Ukraina i kërkoi Gjermanisë, nuk mund t’i dërgohen.
Me një vendim të qeverisë, Zvicra i ndaloi Gjermanisë të dërgojë municione të prodhimit zviceran në Ukrainë për sistemet e mbrojtjes ajrore, që Berlini dëshiron t’i dorëzojë Kievit, për të cilin thotë se ka shumë nevojë.
“Nuk ka ende asnjë arsye për t’iu përgjigjur pozitivisht kërkesës së Gjermanisë për të dërguar materiale luftarake zvicerane në Ukrainë”, bazuar në Aktin e Neutralitetit dhe ligjin zviceran për materialin e luftës, shpjegoi Ministri i Ekonomisë Guy Parmelain, në një letër drejtuar Ministres gjermane të Mbrojtjes, Christine Lambrecht.
Në rastin konkret bëhet fjalë për 12.400 fishekë 35mm i destinuar për ‘Gepard’, një sistem i mbrojtjes kundërajrore, të cilin ukrainasit e kërkojnë veçanërisht për të shkatërruar raketat e lundrimit dhe dronët kamikaze të lëshuara nga forcat ruse.
Berna kishte refuzuar një kërkesë fillestare në qershor, por Ministri gjerman kohët e fundit u tërhoq, duke argumentuar, sipas ‘Spiegel’, se arma ‘Gepard’ është kritike dhe e nevojshme për mbrojtjen e infrastrukturës ukrainase dhe në veçanti portet në Ukrainën jugore, ku nisen anijet e eksportit të grurit.
Gjermania ka dorëzuar ose është në proces të dorëzimit të 30 Gepards në Ukrainë, sipas shifrave zyrtare nga qeveria federale.
Gazeta ‘Süddeutsche Zeitung’ kishte theksuar se më 29 tetor Berlini po përjetonte vështirësi në sigurimin e municioneve për këto sisteme armësh që nuk janë më funksionale në Gjermani. Një zgjidhje nga Norvegjia u braktis, si edhe një nga Brazili gjithashtu, pasi qeveria Bolsonaro kundërshtoi eksportin.
“Trajtimi i barabartë që rezulton nga ligji i neutralitetit nuk lejon që Zvicra të miratojë një kërkesë për transferimin e materialit luftarak me origjinë zvicerane në Ukrainë, ndërkohë që ai vend është i përfshirë në një konflikt të armatosur ndërkombëtar”, nënvizoi Ministri zviceran në një deklaratë për shtyp.
“Kriteret e autorizimit të parashikuara nga legjislacioni zviceran i municioneve gjithashtu përjashtojnë dërgimin e municioneve në vendet e përfshira në një konflikt të tillë”, shtoi ai.
Të mërkurën, qeveria zvicerane njoftoi 100 milionë dollarë ndihmë humanitare për Ukrainën për të siguruar ujë të pijshëm dhe për të rivendosur infrastrukturën e dëmtuar të energjisë me afrimin e dimrit.
Debati i neutralitetit është rindezur në Zvicër me vendimin e Këshillit Federal (dmth të qeverisë së vendit) për të miratuar të gjitha sanksionet e vendosura kundër Rusisë nga Bashkimi Europian që nga 24 shkurti dhe pushtimi i Moskës në Ukrainë.
Disa politikanë zviceranë, veçanërisht në radhët e SVPsë (partia e ekstremit të djathtë dhe në pushtet të vendit), besojnë se kjo lëvizje tashmë po minon parimin e neutralitetit.
E megjithatë, Zvicra mbetet ndër të paktat vende në Europë që nuk po aplikojnë politikën e sanksioneve kundër Rusisë.
