Shuma që duhet të ndajnë, nëse duan të paraqiten si “luanët e luftës”.
SHBA e bën të qartë se nuk do të investojnë para dhe burime.
Donald Trump po e shtyn Europën në kufijtë e saj, komenton Bloomberg në analizën e tij pas komunikimit Trump-Putin për Ukrainën.
Agjencia vlerëson se mbrojtja e Ukrainës dhe forcimi i forcave të armatosura të vendeve më të mëdha në Kontinentin e Vjetër mund të kushtojë 3.1 trilionë dollarë në dekadën e ardhshme dhe diku përgjatë rrugës do të bëhet pyetja e thjeshtë për vendet europiane: Sa duan ende të jenë “luanë lufte” kur të kuptojnë faturën e vërtetë dhe mos mbahen më me paratë amerikane?
Zhvillimet kanë zbuluar shkallën e sfidës me të cilën përballen europianët dhe është një sfidë për të cilën ata duken kryesisht të papërgatitur.
Moska ka një avantazh të konsiderueshëm të fuqisë punëtore ndaj Europës dhe ekonomia e saj e luftës mund të prodhojë artileri dhe pajisje të tjera ushtarake në një shkallë që tejkalon nevojat e ushtrisë në vijën e frontit në Ukrainë, sipas një zyrtari të lartë europian.
Në të njëjtën kohë, Bloomberg Economics shqyrtoi kostot e mbështetjes së Ukrainës përmes negociatave të mundshme, rindërtimit të vendit të shkatërruar nga lufta dhe forcimit të mbrojtjes si të Ukrainës ashtu edhe të Europës.
Rindërtimi i ushtrisë së Ukrainës mund të kushtojë rreth 175 miliardë dollarë gjatë 10 viteve, në varësi të gjendjes së forcave të saj kur të arrihet një zgjidhje dhe gjatë shtrirjes së territorit që do të duhet të mbrojë.
Një forcë paqeruajtëse prej 40,000 trupash do të kushtonte rreth 30 miliardë dollarë gjatë të njëjtës periudhë, megjithëse Zelenski thotë se do t’i nevojiteshin shumë më tepër trupa.
Shumica e parave do të shkojnë për forcimin e ushtrisë së anëtarëve të BE-së dhe shtyrjen e buxhetit të përgjithshëm të mbrojtjes drejt rreth 3.5% të PBB-së, sipas diskutimeve të fundit në selinë e NATO-s në Bruksel.
Financimi shtesë do të ndahet për artilerinë, mbrojtjen ajrore dhe sistemet raketore.
Ai gjithashtu do të forcojë kufijtë lindorë të BE-së, do të përgatisë forcat e BE-së për vendosje të shpejtë dhe do të çojë në një zgjerim të madh në industrinë europiane të mbrojtjes.
Nëse financohet nga borxhi, ai do të shtonte një shtesë prej 2.7 trilion dollarësh në nevojat për huamarrje të pesë anëtarëve më të mëdhenj europianë të NATO-s gjatë dekadës së ardhshme, sipas Bloomberg Economics.
Si do të gjenden burimet?
Në mënyrë që të mobilizojnë burimet në shkallën e kërkuar, qeveritë europiane do të duhet të rimendojnë rrënjësisht sesi do i strukturojnë buxhetet e tyre, që të punojnë me drejtuesit për të ridizajnuar industritë e tyre të mbrojtjes dhe, pothuajse me siguri, të bien dakord për emetimin e përbashkët të borxhit.
Kjo do të kërkojë një nivel vullneti politik, largpamësi dhe sakrifice që shumë anëtarë të BE-së deri më tani nuk kanë arritur ta demonstrojnë, veçanërisht në Europën Perëndimore, ku disa ende e shohin luftën si një problem të largët.
Sa më sipër tregon se këto vende do të kenë zgjedhje të vështira për të dhënë, përsa i përket shpenzimeve për shëndetësi, arsim dhe mirëqenie.
