Rreziku i mbarimit para dimrit!
Gjermania në një pozicion të vështirë. Ekspertët e industrisë së energjisë paralajmërojnë për nivelet e gazit natyror.
Stoqet e gazit natyror në Gjermani kanë rënë në nivelin më të ulët historik për sezonin, pasi ato po bien me shpejtësi për shkak të të ftohtit në vend.
Ekspertët e industrisë, duke folur për ZDF, paralajmëruan se nëse përdorimi vazhdon me të njëjtin ritëm, atëherë stoqet mund të mbarojnë para fundit të sezonit të dimrit.
Stoqet e gazit natyror në Gjermani në nivelin 50%.
Nivelet e gazit natyror në objektet nëntokësore të magazinimit të vendit tani janë shumë më të ulëta se sa ishin në fillim të vitit 2025: rreth 50% krahasuar me rreth 77% në të njëjtën kohë, 12 muaj më parë.
Të dhënat nga Gas Infrastructure Europe (GIE) tregojnë se stoqet kanë rënë me rreth 13% në katër javët e fundit. Nëse konsumi vazhdon me të njëjtin ritëm siç pritet, objektet e magazinimit mund të jenë vetëm në kapacitet 5% deri në mars, tha për ZDF Stefan Deller, një kuadër ekzekutiv tek furnizuesi i energjisë EWE me seli në Oldenburg.
“Nuk dua të jap alarmin, por dua të theksoj se situata aktuale me nivelet e mbushjes është po aq e keqe sa ishte në fillim të vitit 2022”, paralajmëroi ai.
Ai po i referohej njërës prej periudhave më të këqija në historinë e rezervave të energjisë gjermane, pasi nivelet kishin arritur nivele kritike për shkak të një ndërprerjeje të papritur në furnizimin me energji ruse për shkak të luftës në Ukrainë.
Dimër i vështirë, furnizime të vështira!
Ekspertët e industrisë ia atribuojnë tërheqjet e shpejta modelit të motit më të ftohtë se normalja që u shfaq në fund të dhjetorit, duke rritur kërkesën për ngrohje mbi nivelet e zakonshme të janarit. “Me një nivel mbushjeje aktuale prej më pak se 52%, rezervat e gazit natyror janë në një pikë historike të ulët”, tha për ZDF Sebastian Heinermann, CEO i Iniciativës së Ruajtjes së Energjisë.
Tim Keller, anëtar i bordit të Shoqatës së Industrisë së Gazit Natyror dhe Hidrogjenit, e përsëriti paralajmërimin, duke vënë në dukje se “nivelet e stokut janë dukshëm nën mesataren afatgjatë”.
Edhe pse Gjermania ka rritur varësinë e saj nga importet më të shtrenjta të gazit natyror të lëngshëm (LNG) nëpërmjet terminaleve në det të hapur, ekspertët paralajmërojnë se këto mund të plotësojnë vetëm rreth 16% të kërkesës nga nëntori deri në mars.
Deller i bëri thirrje qeverisë që të ndërmarrë veprime më të rrepta, duke përfshirë krijimin e një rezerve kombëtare gazi, për të siguruar furnizime.
Probleme në të gjithë Europën – Gjermania paguan shkëputjen nga Rusia!
Të dhënat tregojnë se problemi është në të gjithë Europën, me vende të tjera që përballen gjithashtu me mungesa dhe rezerva totale që bien nën 60%.
Ulja drastike e energjisë së lirë ruse, e cila për vite me radhë mbulonte nevojat e shteteve europiane, po krijon një presion të madh. Është tregues se Gjermania mbulonte më parë 55% të nevojave të saj për gaz natyror nga Rusia, por tani rubineti është mbyllur për shkak të luftës.
Nga ana e saj Moska, duke kritikuar sanksionet energjetike të BE-së, e ka paralajmëruar BE-në se po “sakrifikon sigurinë energjetike dhe konkurrueshmërinë e industrisë së saj për arsye politike”.
