Në hakmarrje për “shkeljen” e marrëveshjes në Liban nga Izraeli!
Irani thuhet se ka sulmuar tubacionin Lindje-Perëndim të Arabisë Saudite, disa orë pas një marrëveshjeje armëpushimi që synonte ndalimin e përkohshëm të armiqësive në luftën me Shtetet e Bashkuara, tha një burim i industrisë së energjisë për Reuters.
Ky veprim ishte në shenjë hakmarrjeje për “shkeljen” e marrëveshjes në Liban nga ana e Izraelit.
Tubacioni tani është rruga e vetme e eksportit të naftës bruto të mbretërisë, pasi Ngushtica e Hormuzit u mbyll për shkak të konfliktit.
Burimi tha se tubacioni u godit në një sulm që i atribuohet Iranit, ndërsa thuhet se u shënjestruan edhe objekte të tjera energjetike në Arabinë Saudite.
Tubacioni Lindje-Perëndim transportonte rreth 7 milionë fuçi në ditë nga fushat e naftës në Arabinë Saudite lindore në portin e Yanbu-së në Detin e Kuq, pasi mbyllja e Ngushticës së Hormuzit ka bllokuar sasi të mëdha nafte dhe gazi natyror në Gjirin Persik, duke shkaktuar rritje të ndjeshme të çmimeve të energjisë.
Rrjedhat përmes tubacionit pritet të preken, ndërsa një vlerësim i dëmit është duke u zhvilluar. Ekspertët po flasin për një përkeqësim të një krize globale energjitike tashmë të pashembullt.
Korpusi i Gardës Revolucionare të Iranit (IRGC) tha në një deklaratë se kishte nisur sulme me raketa dhe dronë në objektiva të shumtë në rajon, duke përfshirë objektet e naftës të kompanive amerikane në Yanbu.
Koha e saktë e sulmit, shkalla e dëmit ose ndikimi në operacionet e tubacionit nuk ishin menjëherë të qarta. Departamenti i komunikimit i qeverisë saudite dhe Saudi Aramco nuk iu përgjigjën menjëherë kërkesave për koment, përveçse saktësoi faktin që ka dëme në tubacion pas sulmit iranian.
