Italia Kundër Planeve të Macron për Dërgimin e Trupave nga NATO në Ukrainë

Italia kundër planeve të E. Macron për dërgimin e trupave nga NATO në Ukrainë: “Po na shtyni në Luftën e Tretë Botërore”!

Çfarë tha ministri i Jashtëm italian M. Tajani.

“Një deklaratë e mundshme e një JPA do të nënkuptonte dërgimin e forcave ushtarake të BE-së ose NATO-s në Rusi”, tha Ministri i Jashtëm italian, Antonio Tajani, nga ana e tij në një aktivitet në qytetin e Veronës.

“Unë besoj se NATO nuk duhet të hyjë në Ukrainë” dhe “shpresoj që kjo të mos ndodhë”, tha Tajani, duke shtuar se “të hysh dhe të shkosh në luftë me Rusinë do të thotë se rrezikojmë një Luftë të Tretë Botërore”.

“Ne mbrojmë ligjin ndërkombëtar dhe lirinë e Ukrainës, por nuk hyjmë në luftë me Rusinë, i japim Kievit mjete ushtarake, ekonomike, teknike të të gjitha llojeve, por të shkosh në luftë më duket e gabuar për mua dhe për të gjithë italianët – dhe të gjithë njerëzit me arsye të shëndoshë – nuk e duan këtë”, shtoi ministri i Jashtëm italian.

“Ushtria e Italisë po bën mirë atë që po bën në Detin e Kuq, duke mbrojtur anijet tona, po bën mirë në Liban, Afrikë dhe Irak, është bartëse e paqes dhe lirisë, ne nuk jemi në luftë me Rusinë”, shtoi, ndryshe nga kryeministri grek K. Mitsotakis që këmbëngul të deklarojë se “Jemi në luftë me Rusinë”.

Macron, nga ana e tij, insiston në vendosjen e trupave perëndimore në Ukrainë.

Presidenti francez përsëriti, 24 orë më parë, se ai nuk përjashton vendosjen e trupave në Ukrainë, për të penguar Rusinë të fitojë luftën që ka më shumë se dy vjet.

“Të gjitha këto opsione janë të mundshme” tha ai gjatë një interviste me rrjetet televizive TF1 dhe France 2. “Nëse duam të arrijmë paqen në Ukrainë, nuk mund të jemi të dobët” këmbënguli ai.

“Ne duhet ta shikojmë situatën me maturi dhe të themi me vendosmëri, vullnet dhe guxim se jemi gati të përdorim mjetet e nevojshme për të arritur qëllimin tonë, se Rusia nuk e fiton luftën”, shtoi Emmanuel Macron.

Ndërsa Rusia nuk vendos kufij në luftën që ka zhvilluar që nga shkurti 2022 kundër Ukrainës, Perëndimi nuk mund të vendosë kufij në mbështetjen e tij për Kievin.

“I vetmi përgjegjës do të jetë regjimi në Kremlin – jo ne”, pohoi presidenti francez. “Ne kurrë nuk do të sulmojmë, nuk do të marrim një iniciativë të tillë, Franca është një fuqi paqeje”, shtoi ai.

“Nëse Rusia fitonte, jeta e francezëve do të ndryshonte. Nuk do të kishim më siguri në Europë”, shtoi Macron, për të cilin “oreksi” i presidentit rus Vladimir Putin për pushtim territoresh nuk do të ndalej në Ukrainë. “Të duash paqen sot do të thotë të mos lejosh Ukrainën të dështojë”, sipas tij.