Pas “Paketës” së pajisjeve ushtarake të Koresë së Veriut dërguar Rusisë, në kundërshtim me ndihmën monetare të SHBA-së prej 60 miliardë dollarë për Kievin, është e lehtë të kuptohet pse Ukraina po fillon të shtrëngohet, me Putinin që shënon fitore njëra pas tjetrës.
Dihet mirë se Koreja e Veriut po furnizon Rusinë me pajisje ushtarake, duke e mbështetur atë në luftën kundër Ukrainës.
Megjithatë, ajo që nuk dihej deri më tani ishte shtrirja e kësaj ndihme, për të cilën Media Ndërkombëtare na jep informacion të gjerë, duke thënë se “Koreja e Veriut ka dërguar në Rusi 7000 kontejnerë të mbushur me municion dhe pajisje të tjera ushtarake, sipas Ministrit të Jashtëm të Koresë së Jugut, Shin Won-sik”, duke theksuar se “Shin Won-sik e bëri deklaratën gjatë një konference për shtyp, të mbajtur disa orë, pasi zyrtarët ushtarakë të Koresë së Jugut raportuan se Koreja e Veriut kishte goditur me raketa balistike, me rreze të shkurtër veprimi në ujërat lindore të vendit“.
SHBA dhe Koreja e Jugut kanë akuzuar më parë Korenë e Veriut për dërgimin e predhave dhe ndihmave të tjera ushtarake në Rusi gjatë luftës – pretendime që Rusia dhe Peniani i kanë mohuar, sipas Sky News.
Më herët, Prokurori i Përgjithshëm i Ukrainës, Andrii Kostin tha se rusët kanë lëshuar tashmë të paktën 24 raketa balistike të prodhuara nga Koreja e Veriut (ndoshta Kn-23/24) në Ukrainë.
Defence Express kishte foto të detajuara të një rakete nga DPRK e përdorur për të goditur Kharkivin, dëshmi e thellimit të lidhjeve midis Rusisë dhe Koresë së Veriut.
Defense Express gjithashtu raportoi se një studim ukrainas tregoi se kokat e raketave të Koresë së Veriut peshojnë deri në 1.000 kilogramë, por saktësia e tyre është e ulët.
Koreja e Veriut përdor deri në 75% të mikroqarqeve amerikane për të prodhuar raketa balistike.
Numri i komponentëve perëndimorë në raketat balistike të Koresë së Veriut tregon me qartësi absolute efektivitetin e munguar të sanksioneve të vendosura ndaj saj.
Conflict Armament Research (CAR), i cili merret me kërkimin e armëve, ka publikuar një raport mbi hetimin e fragmenteve të raketës balistike të prodhuar nga DPRK, me të cilën Federata Ruse goditi Kharkivin më 2 janar 2024.
Lloji i raketës ende nuk është përcaktuar me siguri, theksojnë studiuesit, pasi mund të jetë gjithashtu një KN-23 ose KN-24.
Qëllimi i përgjithshëm i ekipit të kërkimit CAR ishte të identifikonte komponentët e përdorur në sistemin e navigimit të raketës. Rezultati i studimit në tërësi mund të shihet si një verdikt për të gjithë mekanizmin e sanksioneve të aplikuara aktualisht ndaj vendeve që shkelin ligjin ndërkombëtar, veçanërisht nga vendet perëndimore.
Kështu, 75% e 290 mikroqarqeve të gjetura në raketën e Koresë së Veriut janë të shënuara nga kompanitë amerikane. Një tjetër 16% vjen nga BE-ja, përkatësisht 11.9% nga Gjermania. Azia zë vetëm 9%, veçanërisht Kina 2% dhe Japonia 3.1%.
Në të njëjtën kohë, markat e kompanive nga Koreja e Jugut nuk janë regjistruar.
Akoma më mbresëlënës është fakti se 75% e të gjitha mikroqarqeve janë prodhuar midis 2021 dhe 2023 dhe vetë raketa, duke pasur parasysh datat e prodhimit të elektronikës, nuk mund të ishte montuar më herët se marsi 2023.
Sanksionet ndërkombëtare janë treguar të dobëta, jo efektive kundër Koresë së Veriut, e cila ka gjetur mënyra për t’i anashkaluar ato.
