Mbretëresha e fundit e madhe greke.
Një zbulim i madh arkeologjik ka të ngjarë të nxjerrë në dritë varrin e humbur të Kleopatrës, të cilin Kathleen Martinez, një arkeologe në Universitetin e Santo Domingos, po e kërkon për gati 20 vite.
Martinez në vitin 2022, tha se ekipi i saj kishte zbuluar një tunel 1.305 metra, 13 metra nën tokë, që ajo besonte se do ta afronte atë pranë varrit të mbretëreshës së fundit të madhe greke.
Sepse Kleopatra ishte e fundit e dinastisë Ptolemeike.
Sigurisht, nuk do të bëhet fjalë vetëm për varrin e Kleopatrës, por edhe për të dashurin e saj legjendar, Antoni. Tuneli u zbulua gjatë gërmimit të një tempulli në qytetin antik të rrënuar të Taposiris Magna.
Çfarë është kaq emocionuese për këtë tunel? Së pari, është një mrekulli inxhinierike, me disa seksione të zhytura nën ujë dhe Martinez beson se mund ta sjellë atë një hap më afër varrit të Kleopatrës.
Taposiris Magna ndodhet në bregun verior të Egjiptit dhe Martinez kërkon për varrin mes rrënojave.
Ajo e ka ndjekur objektivin e saj që prej vitit 2005 dhe i tha CNN: “Këmbëngulja ime nuk mund të ngatërrohet me një obsesion. E admiroj Kleopatrën si një figurë historike.
Ajo ishte viktimë e propagandës romake, që synonte të shtrembëronte imazhin e saj. Ajo ishte një grua e arsimuar, ndoshta e para që u arsimua zyrtarisht në Aleksandri, qendra e kulturës në kohën e saj”.
Gjatë gërmimeve të saj, ajo gjeti një tempull kushtuar perëndeshës egjiptiane Isis, që mund të thotë se ajo është në vendin e duhur, duke i thënë CNN se Kleopatra konsiderohej “mishërimi njerëzor i perëndeshës Isis”.
Isis ishte një nga hyjnitë më të rëndësishme të Egjiptit të lashtë.
E martuar me Osirisin, ajo konsiderohej një figurë mbretërore si vetë Kleopatra.
Dhe nuk është vetëm një tunel që është zbuluar, por ka edhe gjetje të tjera që Martinez thotë se mund të jenë çelësi për të gjetur atë që ajo ka kërkuar gjatë gjithë këtyre viteve.
Nëse ata e ndihmojnë atë të gjejë varrin e Kleopatrës, Martinez tha për CNN se “do të jetë zbulimi më i rëndësishëm i shekullit”.
