“Ne nuk do të dërgojmë asnjë ushtar italian në Ukrainë”, thotë Italia.
Kryeministrja italiane Giorgia Meloni dhe zyrtarë të tjerë qeveritarë fajësojnë Sekretarin e Përgjithshëm të NATO-s Jens Stoltenberg për përshkallëzimin e tensioneve me Moskën.
Stoltenberg ka thënë se është “koha” që anëtarët e NATO-s të rishikojnë politikën e tyre dhe të lejojnë Ukrainën të përdorë armë perëndimore për të sulmuar tokën ruse.
“Nuk e di pse Stoltenberg tha diçka të tillë, mendoj se duhet të jemi shumë të kujdesshëm”, tha Meloni për kanalin televiziv italian Rai 3. Kryeministrja italiane theksoi se “NATO duhet të qëndrojë e vendosur dhe të mos sinjalizojë se po tërhiqet”, por këshilloi për “më shumë kujdes”.
“Ka shumë deklarata të dyshimta” shtoi Meloni, duke kujtuar sesi e qortoi presidentin francez Emmanuel Macron për komentet rreth një dislokimi të mundshëm të trupave në Ukrainë.
Ndërkohë, zëvendëskryeministri dhe ministri i Transportit Matteo Salvini tha në një tubim të fushatës të dielën, se “Stoltenberg nuk mund të flasë në emër të popullit italian”.
“NATO nuk mund të na detyrojë të godasim brenda Rusisë, askush nuk mund të na detyrojë të dërgojmë ushtarë italianë në Ukrainë për të luftuar apo për të vdekur atje” tha Salvini, duke argumentuar se Roma po dërgonte armë në Kiev vetëm “për t’u mbrojtur”, por jo për “të luftuar dhe për të goditur dhe vrarë jashtë territorit të saj”.
Duke iu drejtuar Stoltenbergut, Salvini tha:
“Ky zotëri duhet ose të kërkojë falje dhe të korrigjojë komentet e tij, ose të japë dorëheqjen.”
Ministri i Jashtëm Antonio Tajani theksoi gjithashtu se armët që Italia po dërgon në Kiev mund të përdoren vetëm “brenda Ukrainës”.
Antonio Tajani iu referua zhvillimeve në Ukrainë dhe në Lindjen e Mesme mes deklaratave të tij, duke thënë se:
“Nuk do të dërgojmë asnjë ushtar italian për të luftuar në Ukrainë, sepse ne nuk jemi në luftë me Rusinë dhe materiali që dërgojmë nuk synohet të përdoret përtej kufijve, brenda territorit të Rusisë”, tha ai.
Duke iu referuar Lindjes së Mesme, kreu i diplomacisë italiane shtoi se “Italia është e gatshme të dërgojë ushtarët e saj, në rast të një misioni të OKB-së, të drejtuar nga një vend arab, për të përgatitur terrenin për krijimin e një shteti palestinez që Izraeli do ta njohë gjithashtu.”
“Ushtarët tanë janë të dashur, sepse ata mund të punojnë seriozisht, në favor të paqësimit. Askush nuk e promovon paqen më seriozisht se një ushtar”, tha ministri italian. Së fundi, ai përsëriti se “qëllimi është zgjidhja për dy shtete, për dy popuj” dhe se “ndërkohë, lufta duhet të ndalet, me një armëpushim të menjëhershëm, me lirimin e pengjeve izraelitë dhe me ndihma humanitare për popullsinë palestineze”.
