Kryeministri izraelit Benjamin Netaniahu iu drejtua qytetarëve të Iranit në një deklaratë, duke thënë se “populli i Iranit duhet ta dijë – Izraeli qëndron pranë jush”.
“Çdo ditë shihni një regjim që ju nënshtron, bën fjalime të zjarrta për mbrojtjen e Libanit, mbrojtjen e Gazës. Megjithatë, çdo ditë, ky regjim e zhyt rajonin tonë gjithnjë e më thellë në errësirë dhe më thellë në luftë”, tha Netaniahu në videomesazhin e tij drejtuar qytetarëve iranianë, në anglisht.
“Çdo moment që kalon, regjimi ju sjell ju, popullin fisnik pers, më pranë humnerës”, shtoi ai. “Shumica dërrmuese e iranianëve e dinë se regjimi i tyre nuk kujdeset fare për ta. Nëse ai kujdesej vërtet, nëse kujdesej për ju, ai do të ndalonte së shpenzuari miliarda dollarë në luftëra të kota në të gjithë Lindjen e Mesme. Do të fillonte të përmirësonte jetën tuaj. Imagjinoni sikur të gjitha shumat e mëdha të shpenzuara nga regjimi për armët bërthamore dhe luftërat e huaja të investoheshin në edukimin e fëmijëve tuaj, përmirësimin e kujdesit shëndetësor, ndërtimin e infrastrukturës së kombit tuaj, ujin, ujërat e zeza, të gjitha gjërat e tjera që ju nevojiten. Imagjinojeni!”
“Kur Irani të çlirohet përfundimisht, dhe ai moment do të vijë shumë më shpejt nga sa mendojnë njerëzit, gjithçka do të jetë ndryshe”, tha ai. “Dy popujt tanë të lashtë, ai hebre dhe ai pers, më në fund do të jenë në paqe. Dy vendet tona, Izraeli dhe Irani, do të jenë në paqe.
Kur të vijë ajo ditë, rrjeti terrorist që ndërtoi regjimin në pesë kontinente do të çmontohet. Irani do të përjetojë prosperitet si kurrë më parë. Me investime globale, turizëm të madh. Risi e shkëlqyer teknologjike e bazuar në talentin e madh të disponueshëm në Iran. A nuk tingëllon më mirë se varfëria, represioni dhe lufta e pafundme?”
Netaniahu përfundoi: “Mos lejoni që një grup i vogël teokratësh fanatikë të shtypin shpresat dhe ëndrrat tuaja. Ju meritoni më mirë. Fëmijët tuaj meritojnë më mirë. E gjithë bota meriton më mirë. E di që ju nuk i përkrahni përdhunuesit dhe vrasësit e Hamas-it dhe Hezbollah-ut, por liderët tuaj i mbështesin. Ju meritoni më shumë. Populli i Iranit duhet ta dijë, Izraeli qëndron pranë jush. Le të përjetojmë së bashku një të ardhme prosperiteti dhe paqeje”.
