Britani: Mbi 600 Objekte me Vlerë të Vjedhura nga Muzeu i Bristolit

Policia publikon pamjet e të dyshuarve dhe kërkon ndihmë nga publiku.

Më shumë se 600 objekte me vlerë të konsiderueshme kulturore u vodhën nga një muze në Bristol, në jugperëndim të Anglisë, në një vjedhje që ndodhi në shtator, tha policia britanike, duke shtuar se po kërkonin katër të dyshuar.

Policia publikoi pamjet e kamerave të sigurisë që tregonin katër burra në një rrugë dhe i bëri thirrje publikut për ndihmë në identifikimin e tyre.

Hajdutët hynë në ndërtesat ku ndodhet Muzeu i Bristolit i Perandorisë Britanike dhe koleksioni i Komonuelthit. Vjedhja ndodhi në zonën e Rrugës Cumberland midis orës 1 dhe 2 të mëngjesit të enjten, më 25 shtator.

Sendet e vjedhura përfshinin bizhuteri (gjerdanë, byzylykë dhe unaza), sende ushtarake (medalje dhe shenja dalluese), objekte historike dhe figura të gdhendura prej fildishi, bronzi dhe argjendi.

Rreshteri Dan Burgan i Policisë së Avon dhe Somerset tha se vjedhja ishte një humbje e rëndë për qytetin.

Ai tha se shumë nga sendet ishin dhuruar dhe ishin një pjesë e rëndësishme e historisë britanike dhe shpresonte që publiku të ndihmonte në identifikimin e atyre që ishin përgjegjës.