Presidenti i Ukrainës Volodimir Zelenski tha se Rusia nuk po mbetet vëzhgues i thjeshtë në konfliktin e Lindjes së Mesme, por po merr pjesë aktive duke mbështetur Iranin në luftën me Shtetet e Bashkuara dhe Izraelin.
Në një intervistë me RBC-Ukrainë, udhëheqësi ukrainas paralajmëroi se Moska tashmë ka filluar t’i ofrojë ndihmë ushtarake Teheranit dhe nuk e përjashtoi mundësinë e dërgimit të trupave.
Akuza për ndihmë ushtarake!
Sipas Zelenskit, Rusia ka filluar ta forcojë Iranin me pajisje ushtarake, si dronë dhe sisteme të mbrojtjes ajrore.
Në të njëjtën kohë, ai vlerësoi se ky bashkëpunim mund të shtrihet në sistemet e raketave dhe forma të tjera të mbështetjes ushtarake, duke rritur rrezikun e përshkallëzimit të mëtejshëm të konfliktit.
Presidenti ukrainas theksoi se pyetja thelbësore tani është se cili vend do të jetë i pari që do të dërgojë trupa për të mbështetur regjimin iranian.
Shembulli i Koresë së Veriut!
Zelenski kujtoi se në të kaluarën, Koreja e Veriut thuhet se dërgoi rreth 10,000 ushtarë për të mbështetur Rusinë në luftën me Ukrainën.
Sipas tij, një skenar i ngjashëm mund të përsëritet tani në Lindjen e Mesme, me Rusinë që po shqyrton mundësinë e dërgimit të forcave ushtarake në Iran.
Megjithëse këtë variant nuk e pranon askush, për momentin.
Roli në rritje i Moskës!
Moska duket se po merr një rol gjithnjë e më aktiv në konfliktin e Lindjes së Mesme.
Agjencitë britanike të inteligjencës po shqyrtojnë gjithashtu përfshirjen e mundshme të Kremlinit në një sulm me dronë kundër një force detare britanike.
Në të njëjtën kohë, autoritetet ruse kanë deklaruar se vendi nuk mbetet neutral në konflikt dhe se mbështet Iranin kundër Izraelit, duke i përshkruar veprimet e Perëndimit si të padrejta.
Shkëmbimi i teknologjisë dhe inteligjencës ushtarake!
Bashkëpunimi midis Rusisë dhe Iranit duket të jetë dypalësh.
Në fillim të luftës në Ukrainë, Rusia përdori dronë me komponentë iranianë për të sulmuar objektivat ukrainase.
Sot, Irani po merr komponentë dhe teknologji ruse, gjë që rrit aftësinë e tij për të kryer sulme ndaj vendeve në rajon, si dhe ndaj bazave ushtarake amerikane.
Një botim nga The Washington Post raporton gjithashtu se Moska i jep Teheranit informacion në lidhje me vendndodhjen e forcave ushtarake amerikane, anijeve luftarake dhe avionëve në Lindjen e Mesme, gjë që mund të rrisë saktësinë e sulmeve iraniane.
Një “aleancë e domosdoshme”!
Analistët besojnë se bashkëpunimi midis dy vendeve është pjesë e një konvergjence më të gjerë strategjike.
Si Rusia, ashtu edhe Irani po përballen me sanksione të ashpra nga Perëndimi, gjë që po i shtyn ato të bashkëpunojnë më ngushtë në nivel ushtarak dhe ekonomik.
Për më tepër, tensioni në Lindjen e Mesme mund t’i shërbejë Moskës, pasi shpërqendron vëmendjen dhe burimet e vendeve perëndimore nga lufta në Ukrainë.
Paralajmërime nga Uashingtoni!
Shtëpia e Bardhë ka paralajmëruar tashmë se çdo përfshirje e drejtpërdrejtë nga Rusia në mbështetjen e sulmeve iraniane do të kishte pasoja serioze.
Në të njëjtën kohë, analistët besojnë se në rast të një pushtimi tokësor të territorit iranian, Moska mund të zgjedhë forma më indirekte të përfshirjes, siç është dërgimi i mercenarëve nga Grupi Wagner ose edhe ushtarëve nga Koreja e Veriut.
Një skenar i tillë mund ta shndërrojë konfliktin në një krizë më të gjerë ndërkombëtare, me pasoja të paparashikuara për stabilitetin rajonal dhe sigurinë globale.
