Shpërthime dhe zjarr i përhapur në objektin e Viva Energy në Geelong.
Nuk raportohen të lënduar.
Një zjarr i madh është duke u zhvilluar në njërën nga dy rafineritë e Australisë, e cila furnizon rreth 10% të konsumit të përgjithshëm të karburantit të vendit.
Zjarri shpërtheu në objektin e Viva Energy në Geelong, Victoria, pas shpërthimeve që ndodhën në objekt, duke mobilizuar menjëherë forcat e zjarrfikësve.
Sipas autoriteteve, zjarri mbetet aktiv, por është vënë nën kontroll në ambientet e fabrikës, ndërsa po bëhen përpjekje për ta shuar plotësisht. Gaz i lëngshëm nafte dhe gazra të tjerë të ndezshëm po digjen, gjë që po e vështirëson punën e zjarrfikësve.
Deri më tani, nuk është raportuar për të lënduar, ndërsa kompania siguroi se nuk pritet ndonjë ndikim i menjëhershëm në furnizimet me karburant.
Rafineria e Viva Energy ka qenë në funksion që nga viti 1954 dhe ka një kapacitet për të përpunuar deri në 120,000 fuçi naftë në ditë, duke prodhuar benzinë, naftë, LPG dhe karburant avionësh. Sipas kompanisë, ajo mbulon më shumë se 50% të nevojave të Viktorias dhe rreth 10% të konsumit total të karburantit të Australisë.
Zjarri ndodhi vetëm një javë pasi kompania nënshkroi një marrëveshje me qeverinë australiane për të forcuar sigurinë energjetike, në një mjedis me shqetësime të shtuara ndërkombëtare në lidhje me mjaftueshmërinë energjetike për shkak të tensioneve gjeopolitike.
